గణేశ్‌ నిమజ్జనానికి ప్రత్యేక ఎంఎంటీఎస్‌ రైళ్లు

గణేశ్‌ నిమజ్జనానికి వచ్చే భక్తుల రద్దీని దృష్టిలో ఉంచుకుని దక్షిణ మధ్య రైల్వే కీలక నిర్ణయం తీసుకుంది. నిమజ్జన వేడుకల సందర్భంగా ప్రయాణికులకు ఇబ్బందులు కలగకుండా ఈ నెల 25 నుంచి 27 వరకు రాత్రివేళల్లో ఎనిమిది ప్రత్యేక ఎంఎంటీఎస్‌ రైళ్లను నడపనున్నట్లు మంగళవారం ప్రకటించింది. రాత్రి 11 గంటల నుంచి తెల్లవారుజామున 5 గంటల వరకు ఈ ప్రత్యేక సేవలు అందుబాటులో ఉంటాయని సీపీఆర్‌ఓ ఎ. శ్రీధర్‌ తెలిపారు.

ఈ ప్రత్యేక రైళ్లు సికింద్రాబాద్‌, నాంపల్లి, లింగంపల్లి, ఫలక్‌నుమా మధ్య వివిధ మార్గాల్లో నడుస్తాయి. సికింద్రాబాద్‌ నుంచి నాంపల్లి, నాంపల్లి నుంచి లింగంపల్లి, లింగంపల్లి నుంచి నాంపల్లి, నాంపల్లి నుంచి సికింద్రాబాద్‌, నాంపల్లి నుంచి లింగంపల్లి, లింగంపల్లి నుంచి ఫలక్‌నుమా, ఫలక్‌నుమా నుంచి సికింద్రాబాద్‌, సికింద్రాబాద్‌ నుంచి నాంపల్లి మార్గాల్లో సేవలు అందించనున్నారు.