నేటి నుంచి రొయ్యల ఫీడ్‌ ధరల పెంపు అమలు

రొయ్యల మేత ధరల పెంపు నేటి నుంచి అమల్లోకి వచ్చింది. వెనామీ రొయ్యల ఫీడ్‌పై టన్నుకు గరిష్ఠ చిల్లర ధరలో రూ.9,350, టైగర్ రొయ్యల ఫీడ్‌పై రూ.12,870 చొప్పున పెంపు విధించారు. తాజా పెంపుతో టన్ను వెనామీ మేత ధర రూ.1.23 లక్షలకు చేరగా, టైగర్ రొయ్యల ఫీడ్ ధర రూ.1.39 లక్షలకు పెరిగింది.

సంబంధిత వర్గాల మధ్య ఏకాభిప్రాయం కుదరకుండానే ధరల పెంపును అమలు చేయడంపై ఆక్వా రైతులు ఆందోళన వ్యక్తం చేస్తున్నారు. ఇప్పటికే ఉత్పత్తి ఖర్చులతో ఇబ్బందులు పడుతున్న తమపై ఈ పెంపు మరింత ఆర్థిక భారాన్ని మోపుతుందని వారు వాపోతున్నారు. మేత ధరలు పెరగడంతో సాగు వ్యయాలు పెరిగి, లాభాలు తగ్గే ప్రమాదం ఉందని రైతులు ఆందోళన చెందుతున్నారు.