సివిల్స్ అభ్యర్థులకు రాజీవ్ గాంధీ అభయహస్తం అండ

తెలంగాణ నుంచి ఎక్కువ మంది అభ్యర్థులు సివిల్స్‌లో విజయం సాధించాలనే లక్ష్యంతో రాష్ట్ర ప్రభుత్వం సింగరేణి కాలరీస్ కంపెనీ లిమిటెడ్ (ఎస్‌సీసీఎల్) సహకారంతో ప్రారంభించిన ‘రాజీవ్ గాంధీ సివిల్స్ అభయహస్తం’ పథకం మరోసారి మంచి ఫలితాలను సాధించింది. ఈ పథకం ద్వారా సివిల్స్ ప్రిలిమినరీ పరీక్షలో ఉత్తీర్ణులైన తెలంగాణ అభ్యర్థులకు ఆర్థిక ప్రోత్సాహం అందిస్తున్నారు. ఇటీవల విడుదలైన యూపీఎస్సీ సివిల్స్ మెయిన్స్ ఫలితాల్లో ఉత్తీర్ణులైన రాష్ట్ర అభ్యర్థుల్లో 31 మంది తుది ఇంటర్వ్యూకు ఎంపికయ్యారు. రెండు నెలల క్రితం ప్రిలిమినరీ పరీక్షలో అర్హత సాధించిన అభ్యర్థుల నుంచి సింగరేణి దరఖాస్తులను ఆహ్వానించింది. వాటిని పరిశీలించి 158 మందిని అర్హులుగా గుర్తించి ఒక్కొక్కరికి రూ.లక్ష చొప్పున మొత్తం రూ.1.58 కోట్ల ఆర్థిక ప్రోత్సాహకాన్ని అందించింది.

ప్రోత్సాహకం పొందిన 158 మందిలో 31 మంది తాజాగా తుది ఇంటర్వ్యూకు ఎంపికయ్యారు. వీరికి అదనంగా ఒక్కొక్కరికి మరో రూ.లక్ష చొప్పున ఆర్థిక ప్రోత్సాహకం అందించనున్నారు. ఈ ఏడాది ఇంటర్వ్యూకు ఎంపికైన 31 మందిలో 18 మంది ఓబీసీ, ఎనిమిది మంది జనరల్, ముగ్గురు ఎస్సీ, ఇద్దరు ఎస్టీ అభ్యర్థులు ఉన్నారు. మెయిన్స్‌లో ఉత్తీర్ణులై తుది ఇంటర్వ్యూకు అర్హత సాధించిన తెలంగాణ అభ్యర్థులకు ఉప ముఖ్యమంత్రి భట్టి విక్రమార్క అభినందనలు తెలిపారు. సివిల్స్ ఆశావహులకు ఆర్థికంగా అండగా నిలుస్తూ, రాష్ట్రం నుంచి మరింత మంది ఉన్నత స్థాయి ప్రభుత్వ సేవల్లోకి వచ్చేలా ప్రోత్సహించడమే ఈ పథకం లక్ష్యం.