రాజీపడే ప్రధాని దేశ గౌరవాన్ని కాపాడలేరు.. మోదీపై రాహుల్ ఫైర్

అమెరికా సైనిక చర్యల్లో ముగ్గురు భారతీయ నావికులు మరణించిన ఘటనపై లోక్‌సభ ప్రతిపక్ష నేత రాహుల్ గాంధీ కేంద్ర ప్రభుత్వ వైఖరిని తీవ్రంగా విమర్శించారు. హోర్ముజ్ జలసంధి సమీపంలో జరిగిన ఈ ఘటనపై అమెరికా పశ్చాత్తాపం వ్యక్తం చేయలేదని, క్షమాపణ కూడా చెప్పలేదని ఆయన ఆరోపించారు. ఈ అంశంలో భారత ప్రభుత్వం మరింత దృఢంగా స్పందించాల్సిన అవసరం ఉందని పేర్కొన్నారు.

అమెరికా విదేశాంగ మంత్రి మార్కో రూబియో చేసిన వ్యాఖ్యలను ప్రస్తావిస్తూ, ఏ సార్వభౌమ దేశమూ ఇలాంటి భాషను అంగీకరించదని రాహుల్ గాంధీ అన్నారు. ప్రధాని నరేంద్ర మోదీ అమెరికా ఆదేశాలకు తలొగ్గుతున్నారంటూ విమర్శలు గుప్పించారు. దేశ గౌరవాన్ని కాపాడేందుకు స్వతంత్ర వైఖరి అవసరమని, ఈ విషయాన్ని దేశ ప్రజలు గమనించాలని ఆయన సామాజిక మాధ్యమాల్లో చేసిన వ్యాఖ్యల్లో పేర్కొన్నారు.