రష్యా సైన్యంలో భారీ మార్పులు..

రష్యా అధ్యక్షుడు వ్లాదిమిర్ పుతిన్ దేశ సైనిక వ్యవస్థలో కీలక పునర్వ్యవస్థీకరణకు శ్రీకారం చుట్టారు. రక్షణ మంత్రిత్వ శాఖలో పలువురు ఉన్నతాధికారులను నియమిస్తూ కొత్త బాధ్యతలు అప్పగించారు. క్రెమ్లిన్‌లో జరిగిన ఉన్నత స్థాయి సమావేశంలో రక్షణ మంత్రి ఆండ్రీ బెలౌసోవ్, చీఫ్ ఆఫ్ జనరల్ స్టాఫ్ వాలెరీ గెరాసిమోవ్ తదితరుల సమక్షంలో ఈ మార్పులపై చర్చ జరిగింది. కమాండ్ వ్యవస్థ, లాజిస్టిక్స్ సేవలను మరింత సమర్థవంతంగా మార్చడమే లక్ష్యంగా ఈ నిర్ణయాలు తీసుకున్నట్లు తెలుస్తోంది.

తాజా నియామకాలలో అలెగ్జాండర్ సాంచిక్‌కు డిప్యూటీ రక్షణ మంత్రిగా ఆయుధాల సేకరణ, సరఫరా బాధ్యతలు అప్పగించారు. వాలెరీ సోలోడ్‌చుక్‌కు లాజిస్టిక్స్ సేవల పర్యవేక్షణ బాధ్యతలు ఇచ్చారు. దొనెట్స్క్ ప్రాంతంలోని సెంటర్ గ్రూప్ ఆఫ్ ఫోర్సెస్ కమాండర్‌గా ఆండ్రీ ఇవానాయెవ్, ఈస్టర్న్ మిలిటరీ డిస్ట్రిక్ట్ యాక్టింగ్ కమాండర్‌గా ప్యోటర్ బోల్గారెవ్ నియమితులయ్యారు. కొత్తగా ఏర్పాటు చేసిన మానవరహిత వ్యవస్థల దళాల బాధ్యతలను డెనిస్ లయామిన్‌కు అప్పగించారు. ఇటీవల సైనిక సిబ్బంది సంఖ్యను పెంచిన పుతిన్ నిర్ణయం తర్వాత ఈ మార్పులు చోటుచేసుకోవడం గమనార్హం.