‘రివెంజ్‌ డ్రెస్‌’గా ఫేమస్‌ అయిన డయానా గౌన్‌.. వేలం ఎప్పుడు అంటే?

ప్రిన్సెస్‌ డయానా ధరించిన ప్రముఖ నల్ల గౌన్‌ ‘రివెంజ్‌ డ్రెస్‌’గా ప్రపంచవ్యాప్తంగా గుర్తింపు పొందింది. ఇప్పుడు ఈ ఐకానిక్‌ డ్రెస్‌ మరోసారి వార్తల్లోకి వచ్చింది. క్రిస్టినా స్టాంబోలియన్‌ రూపొందించిన ఈ గౌన్‌ను డయానా 1994 జూన్‌ 29న లండన్‌లో జరిగిన వానిటీ ఫెయిర్‌ ఫండ్‌రైజింగ్‌ గాలా కార్యక్రమానికి ధరించి వెళ్లారు. అదే సమయంలో ఆమె అప్పటి భర్త, ప్రస్తుతం బ్రిటన్‌ రాజు అయిన చార్లెస్‌ III తన వైవాహిక జీవితంలో అవిశ్వాసానికి సంబంధించిన విషయాలను టెలివిజన్‌ ఇంటర్వ్యూలో బహిరంగంగా అంగీకరించారు. దీంతో డయానా ధరించిన ఈ డ్రెస్‌ మరుసటి రోజే అంతర్జాతీయంగా చర్చనీయాంశమైంది.

భుజాలపై నుంచి జారినట్టుగా ఉండే డిజైన్‌, శరీరాకృతికి అనుగుణంగా ఉండే కట్‌తో ఈ గౌన్‌ అప్పటి రాజకుటుంబ ఫ్యాషన్‌ సంప్రదాయాలకు భిన్నంగా కనిపించింది. డయానా ధరించిన ఆభరణాలు, ఎర్రటి నెయిల్‌ పాలిష్‌ కూడా ఆమె లుక్‌ను మరింత ప్రత్యేకంగా మార్చాయి. అందుకే ఈ డ్రెస్‌ను చార్లెస్‌కు, అలాగే ప్రపంచానికి డయానా ఇచ్చిన శక్తివంతమైన సందేశంగా ఫ్యాషన్‌ విశ్లేషకులు అభివర్ణించారు. అందుబాటులో ఉన్న సమాచారం ప్రకారం 2026 డిసెంబర్‌ 9న న్యూయార్క్‌లో ఈ డ్రెస్‌ వేలం జరగనుంది. దీని ధర సుమారు రూ.2.8 కోట్ల వరకు పలికే అవకాశం ఉందని అంచనా. వేలానికి ముందు లండన్‌లో ప్రదర్శనకు ఉంచనున్నట్లు సమాచారం.