జనగణనలో ఓబీసీల వివరాలకు ప్రత్యేక కాలమ్‌ ఏర్పాటు చేయాలి - కల్వకుంట్ల కవిత

జనగణనలో ఇతర వెనుకబడిన తరగతుల (ఓబీసీ) వివరాలను నమోదు చేసేందుకు ప్రత్యేక కాలమ్‌ ఏర్పాటు చేయాలని తెలంగాణ రక్షణసేన అధ్యక్షురాలు కల్వకుంట్ల కవిత డిమాండ్‌ చేశారు. బుధవారం హైదరాబాద్‌లోని బాగ్‌లింగంపల్లి ఆర్టీసీ కళాభవన్‌లో నిర్వహించిన ఓబీసీ డిక్లరేషన్‌ సభలో ఆమె మాట్లాడుతూ, తమిళనాడు తరహాలో తెలంగాణ ప్రభుత్వం కూడా అసెంబ్లీలో ప్రత్యేక తీర్మానం చేసి కేంద్రంపై ఒత్తిడి తేవాలని కోరారు. ఓబీసీల వివరాలను నమోదు చేసేందుకు ప్రత్యేక కాలమ్‌తో పాటు డ్రాప్‌డౌన్‌ బాక్స్‌ కూడా ఏర్పాటు చేయాలని సూచించారు. కేంద్రం స్పందించకపోతే రాష్ట్రంలో జనగణన ప్రక్రియను అడ్డుకోవాలని పిలుపునిచ్చారు. రిజర్వేషన్లను ఎత్తివేసేందుకు కేంద్ర ప్రభుత్వం కుట్ర చేస్తోందని ఆరోపించిన కవిత, ఎస్సీ, ఎస్టీ, ఓబీసీలు ఐక్యంగా పోరాడితేనే తమ హక్కులను కాపాడుకోగలరని అన్నారు. రాబోయే తరాలకు అందించగల విలువైన ఆస్తి రిజర్వేషన్ల సాధనేనని వ్యాఖ్యానించారు.

వివిధ రాష్ట్రాల్లో బీసీ కులాలకు వేర్వేరు పేర్లు ఉండటంతో, వాటిని విడివిడిగా లెక్కిస్తే వారి జనాభా వాస్తవానికి మించి తక్కువగా కనిపించే ప్రమాదం ఉందని కవిత ఆందోళన వ్యక్తం చేశారు. కేంద్ర బడ్జెట్‌లో బీసీల సంక్షేమానికి తగిన నిధులు కేటాయించడం లేదని విమర్శించారు. సుమారు రూ.50 లక్షల కోట్ల కేంద్ర బడ్జెట్‌లో బీసీల కోసం ఏటా రూ.2,000 కోట్లు కూడా ఖర్చు చేయడం లేదని ఆరోపించారు. జనగణన కోసం కేంద్రం రూ.12,000 కోట్లు ఖర్చు చేస్తున్నప్పటికీ, బీసీల జనాభా ఎంత ఉందో తేల్చలేకపోతే ఆ ఖర్చు వృథా అవుతుందని అన్నారు. ఈ అంశంపై ముఖ్యమంత్రి రేవంత్‌రెడ్డికి చిత్తశుద్ధి లేదని కవిత ఆరోపించారు. అఖిలపక్షాన్ని ఢిల్లీకి తీసుకెళ్తానని చెప్పిన సీఎం, ప్రధాని నరేంద్ర మోదీని సుమారు 30 సార్లు కలిసినా సంబంధిత బిల్లు గురించి ప్రస్తావించలేదని విమర్శించారు. ఈ కార్యక్రమంలో వివిధ రాష్ట్రాలకు చెందిన ఓబీసీ, విద్యార్థి సంఘాల నాయకులు, ప్రొఫెసర్లు పాల్గొన్నారు.