కాంగ్రెస్ - ఆర్‌ఎస్‌ఎస్ మధ్య మరోసారి మాటల యుద్ధం

కాంగ్రెస్ నేత పవన్ ఖేరా ఆర్‌ఎస్‌ఎస్ చీఫ్ మోహన్ భగవత్‌పై విమర్శలు గుప్పిస్తూ, రాష్ట్రీయ స్వయంసేవక్ సంఘ్ (ఆర్‌ఎస్‌ఎస్) నమోదు వివరాలు, చట్టబద్ధ హోదా, పారదర్శకతపై ప్రశ్నలు లేవనెత్తారు. మీడియా సమావేశంలో మాట్లాడిన ఆయన, సాధారణ ప్రజలు తమ గుర్తింపు లేదా పౌరసత్వానికి సంబంధించిన పత్రాలు చూపించాలని అడిగితే, ప్రజా జీవితంపై ప్రభావం చూపే సంస్థలు కూడా తమ పత్రాలను వెల్లడించాలని అన్నారు.

ఆర్‌ఎస్‌ఎస్ తన నమోదు, సంస్థాగత నిర్మాణానికి సంబంధించిన వివరాలను బహిరంగంగా వెల్లడించాలని పవన్ ఖేరా డిమాండ్ చేశారు. పౌరసత్వం, పాలన, ప్రజా వ్యవహారాల్లో భావజాల సంస్థల పాత్ర వంటి అంశాలపై కాంగ్రెస్, ఆర్‌ఎస్‌ఎస్ మధ్య కొనసాగుతున్న రాజకీయ విభేదాల నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి. అయితే ఈ వ్యాఖ్యలపై ఆర్‌ఎస్‌ఎస్ ఇంకా స్పందించలేదు.