పే స్లిప్ లేకుండానే పర్సనల్ లోన్ పొందవచ్చా? ఆదాయం నిరూపించేందుకు నాలుగు మార్గాలు

పర్సనల్ లోన్ కోసం దరఖాస్తు చేసుకునే ఉద్యోగుల నుంచి బ్యాంకులు సాధారణంగా పే స్లిప్‌లను ఆదాయ ఆధారంగా అడుగుతాయి. అయితే, ఫ్రీలాన్సర్లు, స్వయం ఉపాధి పొందేవారు, వ్యాపారులకు పే స్లిప్ లేకపోయినా ఆదాయాన్ని నిరూపించేందుకు ప్రత్యామ్నాయ మార్గాలు ఉన్నాయి. గత రెండేళ్ల ఆదాయపు పన్ను రిటర్నులు (ITR) సమర్పించడం ద్వారా వార్షిక ఆదాయం, ఆర్థిక స్థితిని బ్యాంకులకు వివరించవచ్చు. అలాగే, గత ఆరు నుంచి పన్నెండు నెలల బ్యాంక్ స్టేట్‌మెంట్లను అందించి ఖాతాలోకి వస్తున్న ఆదాయం, లావాదేవీల వివరాలను చూపించవచ్చు.

వ్యాపారులు తమ వ్యాపార కార్యకలాపాలను నిరూపించేందుకు జీఎస్టీ రిజిస్ట్రేషన్ లేదా షాప్ అండ్ ఎస్టాబ్లిష్‌మెంట్ సర్టిఫికెట్ వంటి పత్రాలను సమర్పించవచ్చు. మంచి క్రెడిట్ స్కోర్ ఉండటం, గతంలో ఈఎంఐలు, క్రెడిట్ కార్డు బిల్లులను సకాలంలో చెల్లించిన చరిత్ర కూడా రుణ దరఖాస్తుకు ఉపయోగపడుతుంది. ఇప్పటికే బ్యాంకులో సేవింగ్స్ లేదా కరెంట్ ఖాతా ఉంటే, అందులో క్రమం తప్పకుండా లావాదేవీలు నిర్వహించడం, తగినంత నిల్వలు ఉంచడం ద్వారా ఆర్థిక స్థితిని వివరించవచ్చు. అయితే, ఈ పత్రాలు సమర్పించినంత మాత్రాన రుణం మంజూరవుతుందని హామీ లేదు. బ్యాంకు నిబంధనలు, ఆదాయ స్థిరత్వం, క్రెడిట్ చరిత్ర ఆధారంగానే తుది నిర్ణయం ఉంటుంది.