మహిళలతో కలిసి బతుకమ్మ పేర్చిన మంత్రి సీతక్క

తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకల్లో మంత్రి సీతక్క పాల్గొన్నారు. సచివాలయం సమీపంలోని అమరజ్యోతి ప్రాంగణంలో మహిళలతో కలిసి తీరొక్క పూలతో అందంగా బతుకమ్మను పేర్చారు. ఈ సందర్భంగా మహిళలతో మమేకమైన ఆమె బతుకమ్మ పాటలు పాడుతూ పండుగ సందడిని మరింత పెంచారు. తెలంగాణ ఆడపడుచుల ఆత్మీయతకు, ప్రకృతితో మమేకమైన జీవనశైలికి ప్రతీకగా నిలిచే బతుకమ్మ పండుగను సంప్రదాయబద్ధంగా జరుపుకున్నారు.

అంతకుముందు మంత్రి సీతక్క తన నివాసమైన ప్రజాభవన్‌లో కాంగ్రెస్ మహిళా నేతలు, తన వ్యక్తిగత సిబ్బందితో కలిసి బతుకమ్మను సిద్ధం చేశారు. అనంతరం అమరజ్యోతి ప్రాంగణంలో మహిళలతో కలిసి పూలను పేర్చి పండుగ వేడుకల్లో ఉత్సాహంగా పాల్గొన్నారు. మహిళల ఐక్యతను, తెలంగాణ సంస్కృతి వైభవాన్ని చాటిచెప్పేలా సాగిన ఈ వేడుకలతో ప్రాంగణమంతా పండుగ వాతావరణం నెలకొంది.