బీజేపీ ఎమ్మెల్యే మైథిలీ ఠాకూర్ కుటుంబంపై భూకబ్జా ఆరోపణలు

బీహార్‌లోని దర్భంగాలో బీజేపీ ఎమ్మెల్యే మైథిలీ ఠాకూర్, ఆమె తండ్రి రమేశ్ ఠాకూర్‌పై ప్రభుత్వ, ప్రైవేటు భూములను ఆక్రమించారంటూ గ్రామస్థులు ఫిర్యాదు చేశారు. పోఖర్‌భిండా పంచాయతీ పరిధిలోని గ్రామ దేవతకు చెందిన భూమి, ప్రజా రహదారి, మురుగునీటి కాలువ, శ్మశానవాటికకు సంబంధించిన స్థలాల విషయంలో వివాదం నెలకొన్నట్లు ఫిర్యాదులో పేర్కొన్నారు. ఠాకూర్ కుటుంబం నిర్మిస్తున్న ప్రహరీ గోడ కారణంగా ప్రజలు ఉపయోగించే దారి మూసుకుపోయిందని, చెరువుకు అనుసంధానమైన మురుగునీటి కాలువను మట్టితో పూడ్చివేశారని గ్రామస్థులు ఆరోపించారు.

ఈ విషయంపై గ్రామస్థులు సర్కిల్ ఆఫీసర్‌ను ఆశ్రయించడంతో పాటు బీహార్ ప్రభుత్వ సహయోగ్ పోర్టల్ ద్వారా ఫిర్యాదు చేశారు. భూములపై అధికారిక సర్వే నిర్వహించి, నిష్పక్షపాతంగా విచారణ జరపాలని వారు కోరుతున్నారు. ఇరువర్గాల వాదనలు వినేందుకు జనతా దర్బార్‌కు పిలుస్తామని, అనంతరం తదుపరి చర్యలపై నిర్ణయం తీసుకుంటామని సర్కిల్ ఆఫీసర్ అలోక్ కుమార్ తెలిపారు. అయితే, భూకబ్జాకు సంబంధించిన ఆరోపణలు ఇంకా నిర్ధారణ కాలేదు. అధికారుల విచారణలోనే వాస్తవాలు వెలుగులోకి రావాల్సి ఉంది.