ఇస్రోకు మరో విజయం.. కక్ష్యలోకి NVS-03 ఉపగ్రహం

భారత అంతరిక్ష పరిశోధనా సంస్థ (ఇస్రో) శ్రీహరికోటలోని సతీష్ ధావన్ అంతరిక్ష కేంద్రం నుంచి చేపట్టిన GSLV-F18 రాకెట్ ప్రయోగం విజయవంతమైంది. ఈ ప్రయోగం ద్వారా NVS-03 నావిగేషన్ ఉపగ్రహాన్ని నిర్దేశిత కక్ష్యలోకి ప్రవేశపెట్టారు. దీంతో భారత అంతరిక్ష పరిశోధన రంగంలో మరో కీలక విజయం నమోదైంది.

2,232 కేజీల బరువున్న NVS-03 ఉపగ్రహం కక్ష్యలో 13 ఏళ్లపాటు పనిచేసేలా రూపొందించారు. దేశ నావిగేషన్ వ్యవస్థను మరింత బలోపేతం చేయడం, ఉపగ్రహ ఆధారిత నావిగేషన్ సేవలను మెరుగుపరచడం ఈ ప్రయోగం ప్రధాన లక్ష్యాలు. ఈ ఉపగ్రహం అందించే సేవలు భారత స్వదేశీ నావిగేషన్ వ్యవస్థ అభివృద్ధికి తోడ్పడనున్నాయి.