ఫ్లైదుబాయ్‌ ఘటనలో భారత పైలట్‌కు ప్రశంసలు

దుబాయ్‌ నుంచి టెల్‌ అవీవ్‌కు వెళ్తున్న ఫ్లైదుబాయ్‌ విమానంలో జరిగిన కాక్‌పిట్‌ ఘటనలో గాయపడిన భారత పైలట్‌ కెప్టెన్‌ స్మిత్ మచ్చర్‌పై ప్రధాని నరేంద్ర మోదీ, ఇజ్రాయెల్‌ ప్రధాని బెంజమిన్‌ నెతన్యాహు, అమెరికా అధ్యక్షుడు డొనాల్డ్‌ ట్రంప్‌ ప్రశంసలు కురిపించారు. విమాన ప్రయాణంలో కోపైలట్‌ కత్తితో దాడి చేసినప్పటికీ మచ్చర్‌ ధైర్యంగా ప్రతిఘటించారని నెతన్యాహు కొనియాడారు. గాయపడిన స్థితిలోనూ కాక్‌పిట్‌ తలుపు తెరవడంతో ప్రయాణికులు, సిబ్బంది లోపలికి చేరుకుని దాడిచేసిన కోపైలట్‌ను అదుపులోకి తీసుకోవడంలో సహకరించారని తెలిపారు. ట్రంప్‌ కూడా మచ్చర్‌ను హీరోగా అభివర్ణించారు.

ఫ్లైదుబాయ్‌ విమానం ఎఫ్‌జెడ్‌1073లో మొత్తం 174 మంది ఉన్నారు. బోయింగ్‌ 737 మ్యాక్స్‌ 8 విమానంలో కాక్‌పిట్‌ ఘటన అనంతరం విమానం ఒక్కసారిగా కిందికి దిగింది. ప్రయాణికులు, సిబ్బంది కలిసి కోపైలట్‌ను అదుపులోకి తీసుకోగా, ప్రయాణికులుగా ఉన్న ఫ్లైదుబాయ్‌కి చెందిన మరో ఇద్దరు పైలట్లు విమాన నియంత్రణను చేపట్టారు. అనంతరం విమానాన్ని సౌదీ అరేబియాలోని తబుక్‌ విమానాశ్రయంలో సురక్షితంగా దించారు. గాయపడిన కెప్టెన్‌ మచ్చర్‌ను ఆసుపత్రికి తరలించగా, ఆయన పరిస్థితి నిలకడగా ఉన్నట్లు సమాచారం.