హైదరాబాద్ మెట్రోలో సమాచార గందరగోళం..

హైదరాబాద్ మెట్రో రైళ్లలో ప్రయాణికులకు రియల్‌టైమ్ సమాచారం అందించే ప్యాసింజర్ ఇన్ఫర్మేషన్ సిస్టమ్‌ (పీఐఎస్)లో ఇటీవల లోపాలు కనిపిస్తున్నాయి. దీంతో డిస్‌ప్లేలు, ఆడియో ప్రకటనల్లో కచ్చితమైన సమాచారం అందడం లేదని ప్రయాణికులు అసంతృప్తి వ్యక్తం చేస్తున్నారు. ఉప్పల్ డిపోలోని ఆపరేషన్ కంట్రోల్ సెంటర్‌ నుంచి పనిచేసే ఈ వ్యవస్థ, తదుపరి స్టేషన్ వివరాలను ఆడియో ద్వారా ప్రకటించడంతో పాటు రైళ్లు, స్టేషన్లలోని డిస్‌ప్లే బోర్డులపై సమాచారాన్ని చూపిస్తుంది. ఇది సిగ్నలింగ్, ట్రాక్ వ్యవస్థలతో అనుసంధానమై రియల్‌టైమ్ వివరాలను అందిస్తుంది.

ఇటీవల మెట్రో రైలులో ప్రయాణికులకు కనిపించే సమాచారంలో తేడాలు చోటుచేసుకున్నట్లు తెలుస్తోంది. ఒక సందర్భంలో రైలు మూసాపేట స్టేషన్‌లో ఉండగా.. డిస్‌ప్లే బోర్డులో మలక్‌పేట అని కనిపించడంతో ప్రయాణికులు గందరగోళానికి గురయ్యారు. అలాగే స్టేషన్‌లో తదుపరి మెట్రో రైలు ఎన్ని నిమిషాల్లో వస్తుందనే సమాచారంలోనూ వ్యత్యాసాలు ఉంటున్నాయని ప్రయాణికులు చెబుతున్నారు. బోర్డులో చూపించిన సమయానికి కాకుండా రైళ్లు కొన్నిసార్లు ముందుగానో, ఆలస్యంగానో వస్తున్నాయని వారు పేర్కొంటున్నారు.