విశాఖ స్టేడియం సమీపంలో హెలికాప్టర్ చక్కర్లు… మ్యాచ్‌కు ముందు క్షణిక భద్రతా అలర్ట్!

విశాఖపట్నంలోని ఏసీఏ–వీడీసీఏ అంతర్జాతీయ క్రికెట్ స్టేడియం పరిసరాల్లో బుధవారం సాయంత్రం మ్యాచ్ ప్రారంభానికి ముందు హఠాత్తుగా ఓ హెలికాప్టర్ చక్కర్లు కొట్టడంతో క్షణిక భద్రతా ఆందోళన నెలకొంది. ఇరు జట్ల ఆటగాళ్లు బస్సుల్లో స్టేడియానికి చేరుకుని డ్రెస్సింగ్ రూమ్‌లకు వెళ్లిన సమయంలో తక్కువ ఎత్తులో హెలికాప్టర్ స్టేడియం చుట్టూ రెండు సార్లు తిరగడంతో పోలీసులు అప్రమత్తమయ్యారు. అనంతరం అది మధురవాడ ఐటీ హిల్స్ మీదుగా సముద్ర తీరం వైపుకు వెళ్లింది.

విచారణ అనంతరం అది విశాఖ ఉత్సవ్‌లో భాగంగా రుషికొండ బీచ్ వద్ద ఏర్పాటు చేసిన హెలిరైడ్‌కు సంబంధించిన హెలికాప్టర్‌గా పోలీసులు నిర్ధారించారు. స్టేడియం సమీప గగనతలంలోకి రాకపోకలు నిర్వహించవద్దని నిర్వాహకులను హెచ్చరించారు. కొంతసేపు అప్రమత్తత కొనసాగిన తర్వాత పరిస్థితి పూర్తిగా సాధారణ స్థితికి చేరుకుంది.