గుంటూరు ఇన్నర్ రింగ్ రోడ్డులో భారీ అగ్నిప్రమాదం...

గుంటూరు నగరంలోని ఇన్నర్ రింగ్ రోడ్డులో గురువారం భారీ అగ్నిప్రమాదం చోటుచేసుకుంది. ఓ కాంట్రాక్టర్‌కు చెందిన ఖాళీ స్థలంలో నిల్వ ఉంచిన అండర్ గ్రౌండ్ డ్రైనేజీ (UGD) పైపులకు ఒక్కసారిగా మంటలు అంటుకుని వేగంగా వ్యాపించాయి. ప్లాస్టిక్ మెటీరియల్ కావడంతో మంటలు క్షణాల్లోనే తీవ్ర రూపం దాల్చాయి. దట్టమైన నల్లటి పొగ కిలోమీటర్ల మేర వ్యాపించి స్థానికులు, వాహనదారులు తీవ్ర ఇబ్బందులు ఎదుర్కొన్నారు.

సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేసే ప్రయత్నం చేస్తున్నారు. గంటకు పైగా నిరంతరాయంగా నీటిని చల్లుతున్నప్పటికీ మంటలు పూర్తిగా అదుపులోకి రాలేదు. భారీగా నిల్వ ఉన్న పైపుల కారణంగా పరిస్థితి మరింత క్లిష్టంగా మారింది. ప్రమాదానికి గల కారణాలు ఇంకా తెలియాల్సి ఉంది. పోలీసులు, ఫైర్ అధికారులు పరిస్థితిని సమీక్షిస్తున్నారు.