గ్రీన్ ఇండియా మిషన్ లక్ష్యానికి భారీ దూరం.. కాగ్ నివేదికలో కీలక అంశాలు

పార్లమెంట్‌లో ఆగస్టు 13న ప్రవేశపెట్టిన కంప్ట్రోలర్ అండ్ ఆడిటర్ జనరల్ (కాగ్) నివేదిక ప్రకారం గ్రీన్ ఇండియా మిషన్ అటవీ, చెట్ల విస్తీర్ణాన్ని పెంచే లక్ష్యంలో భారీగా వెనుకబడింది. 1.4 మిలియన్ హెక్టార్లలో అటవీ విస్తీర్ణాన్ని పెంచాలని లక్ష్యంగా పెట్టుకోగా, కేవలం 0.03409 మిలియన్ హెక్టార్లలోనే పెరుగుదల సాధించింది. దీంతో నిర్దేశిత లక్ష్యంలో 97.57 శాతం లోటు నమోదైంది.

పర్యావరణ మంత్రిత్వ శాఖ ఆధ్వర్యంలో అమలవుతున్న ఈ కార్యక్రమాన్ని 2015-16 నుంచి 2024-25 వరకు 16 రాష్ట్రాలు, కేంద్రపాలిత ప్రాంతాల్లో కాగ్ పరిశీలించింది. ప్రణాళికలోపాలు, బలహీనమైన సమన్వయం, దీర్ఘకాలంగా కొనసాగుతున్న నిధుల కొరత వల్ల కార్యక్రమం ఆశించిన స్థాయిలో ముందుకు సాగలేదని నివేదిక పేర్కొంది. CAMPA, MGNREGS, నగర్ వన్ యోజన, స్కూల్ నర్సరీ యోజన వంటి ఇతర పథకాలతో సమన్వయం సరిగా లేకపోవడం కూడా ప్రభావం చూపిందని వెల్లడించింది.