తెలంగాణలో పెరుగుతున్న చలి తీవ్రత

తెలంగాణ రాష్ట్రంలో చలి తీవ్రత క్రమంగా పెరుగుతోంది. ముఖ్యంగా రాత్రి వేళల్లో ఉష్ణోగ్రతలు గణనీయంగా పడిపోతున్నాయి. రాష్ట్రంలోని 16 జిల్లాల్లో కనిష్ఠ ఉష్ణోగ్రతలు 14.7 నుంచి 15 డిగ్రీల మధ్య నమోదయ్యాయి. ఆదిలాబాద్ జిల్లాలోని నేరడిగొండలో అత్యల్పంగా 14.7 డిగ్రీల ఉష్ణోగ్రత రికార్డయింది. దీంతో ఆయా ప్రాంతాల్లో చలి ప్రభావం ఎక్కువగా కనిపిస్తోంది.

మరోవైపు గ్రేటర్ హైదరాబాద్ పరిధిలోనూ రాత్రి ఉష్ణోగ్రతలు తగ్గుముఖం పట్టాయి. నగర పరిసర ప్రాంతాల్లో కనిష్ఠ ఉష్ణోగ్రతలు 17 నుంచి 19 డిగ్రీల మధ్య నమోదవుతున్నాయి. రాత్రి, తెల్లవారుజామున చలి ఎక్కువగా ఉండటంతో ప్రజలు అప్రమత్తంగా ఉండాల్సిన పరిస్థితి నెలకొంది. రానున్న రోజుల్లో ఉష్ణోగ్రతల్లో వచ్చే మార్పులపై ప్రజలు దృష్టి సారిస్తున్నారు.