ఆహార భద్రతకు తెలంగాణ సర్కారు సన్నద్ధం

ఎల్‌నినో ప్రభావంతో వర్షాభావ పరిస్థితులు, పంట నష్టాలు, ఆహార ధరల పెరుగుదల తలెత్తే అవకాశాలను దృష్టిలో ఉంచుకుని తెలంగాణ ప్రభుత్వం ముందస్తు చర్యలు చేపడుతోందని పౌరసరఫరాలు, నీటిపారుదల శాఖల మంత్రి ఎన్‌. ఉత్తమ్‌కుమార్‌రెడ్డి తెలిపారు. సోమవారం హైదరాబాద్‌లోని సచివాలయంలో పౌరసరఫరాల శాఖ ఉన్నతాధికారులతో నిర్వహించిన సమీక్షలో ఆయన మాట్లాడారు. ప్రజాపంపిణీ వ్యవస్థపై ఆధారపడిన 3.42 కోట్ల మంది ప్రజలకు ఆహార భద్రత కల్పించేందుకు ధాన్య నిల్వలను బలోపేతం చేయాలని సూచించారు. రాబోయే వరి పంట దిగుబడిపైనే పూర్తిగా ఆధారపడకుండా ప్రతికూల పరిస్థితులను ఎదుర్కొనేందుకు ముందస్తు కార్యాచరణ సిద్ధం చేయాలని ఆదేశించారు.

ప్రజాపంపిణీ వ్యవస్థ, సంక్షేమ పథకాల కోసం రాష్ట్రానికి నెలకు సుమారు 2.38 లక్షల మెట్రిక్‌ టన్నుల బియ్యం అవసరమని అధికారులు తెలిపారు. అక్టోబర్‌ 16 నాటికి గోదాముల్లో 9.64 లక్షల మెట్రిక్‌ టన్నుల బియ్యం నిల్వ ఉండగా, పెండింగ్‌లో ఉన్న కస్టమ్‌ మిల్లింగ్‌ బియ్యం, ఇతర సరఫరాల ద్వారా మరో 18.39 లక్షల మెట్రిక్‌ టన్నులు రావాల్సి ఉందన్నారు. మొత్తం 28.03 లక్షల మెట్రిక్‌ టన్నుల బియ్యం అందుబాటులోకి వస్తే సుమారు 11.7 నెలల అవసరాలకు సరిపోతుందని అంచనా వేశారు. రేషన్‌ దుకాణాల ద్వారా గోధుమపిండి, కందిపప్పు, పామాయిల్‌, చక్కెర తదితర నిత్యావసరాలను సబ్సిడీ ధరలకు పంపిణీ చేసే అవకాశాలను, వాటి వ్యయాన్ని పరిశీలించాలని మంత్రి ఆదేశించారు.