అంతరిక్షంలో వ్యోమగాముల ఫుట్‌బాల్‌ మ్యాచ్‌..

అంతర్జాతీయ అంతరిక్ష కేంద్రం (ISS)లో వ్యోమగాములు తమ బిజీ షెడ్యూల్‌ నుంచి కాసేపు విరామం తీసుకుని మైక్రోగ్రావిటీలో ఫుట్‌బాల్‌ ఆడారు. భారత సంతతికి చెందిన నాసా వ్యోమగామి అనిల్‌ మేనన్‌ ఈ సరదా ఆటకు సంబంధించిన వీడియోను ‘ఎక్స్‌’లో షేర్‌ చేశారు. వీడియోలో వ్యోమగాములు అంతరిక్ష కేంద్రంలో తేలియాడుతూ బంతిని పాస్‌ చేస్తూ, గోల్‌ వైపు కిక్‌లు కొడుతూ కనిపించారు. భూమిపై మాదిరిగా పరుగెత్తాల్సిన అవసరం లేకపోవడంతో ఈ ఆట ఎంతో ప్రత్యేకంగా కనిపించింది.

అంతరిక్ష కేంద్రంలో ఫుట్‌బాల్‌ అందరినీ ఏకతాటిపైకి తీసుకువచ్చే ఆటగా నిలిచిందని అనిల్‌ మేనన్‌ పేర్కొన్నారు. వారాంతంలో కాసేపు ప్రశాంతంగా గడపడం, తర్వాతి వారంలోని బిజీ షెడ్యూల్‌కు సిద్ధం కావడానికి ఉపయోగపడుతుందని తెలిపారు. ఇందులో భాగంగా ఫుట్‌బాల్‌ ఆడామని, ఈ ఆట తమకు ఎంతో ఉల్లాసాన్ని అందించిందని మేనన్‌ వివరించారు. మైక్రోగ్రావిటీలో జరిగిన ఈ ప్రత్యేక ఫుట్‌బాల్‌ ఆట వ్యోమగాములకు సరదాతో పాటు ఉత్సాహాన్ని అందించింది.