విమాన సిబ్బందిపై ఎయిరిండియా ఎక్స్‌ప్రెస్‌ కఠిన చర్యలు

దుబాయ్‌ నుంచి అమృత్‌సర్‌కు వచ్చిన ఎయిరిండియా ఎక్స్‌ప్రెస్‌ విమాన సిబ్బందిలో ఎనిమిది మందిని సంస్థ మూడు నెలల పాటు సస్పెండ్‌ చేసింది. అమృత్‌సర్‌లోని శ్రీ గురు రామ్‌దాస్‌ జీ అంతర్జాతీయ విమానాశ్రయంలో ల్యాండైన రెండు గంటల్లోపు తప్పనిసరిగా పోస్ట్‌-ఫ్లైట్‌ డిక్లరేషన్‌, బ్రీత్‌ అనలైజర్‌ పరీక్ష పూర్తి చేయాల్సి ఉండగా.. వారు 35 నిమిషాలు ఆలస్యంగా పరీక్షకు హాజరయ్యారు.

ఈ ఘటనను ఎయిరిండియా ఎక్స్‌ప్రెస్‌ డీజీసీఏ దృష్టికి తీసుకెళ్లింది. సిబ్బందికి నిర్వహించిన ఆల్కహాల్‌ పరీక్షల్లో ఫలితాలు నెగెటివ్‌గా వచ్చినప్పటికీ, నిర్ణీత గడువులో పరీక్షకు హాజరుకాకపోవడాన్ని నిబంధనల ఉల్లంఘనగా పరిగణించి సంస్థ చర్యలు తీసుకుంది. ఇటీవల ఫుకెట్‌-దిల్లీ విమాన ఘటనలో పైలట్‌ డ్రగ్‌ టెస్టులో సైకోయాక్టివ్‌ పదార్థానికి పాజిటివ్‌గా తేలిన నేపథ్యంలో విమాన సిబ్బంది పరీక్షలపై మరింత కఠిన నిబంధనలు అమల్లోకి వచ్చాయి.