నేపాల్‌లో ఘోర హెలికాప్టర్ ప్రమాదం

నేపాల్‌లోని సోలుఖుంబు ప్రాంతంలో మంగళవారం ఉదయం రెండు హెలికాప్టర్లు ఢీకొని ప్రమాదం జరిగింది. ఫెరిచే హెలిప్యాడ్ వద్ద ల్యాండ్ అవుతున్న సమయంలో ఈ ఘటన చోటుచేసుకుంది. ల్యాండింగ్‌కు కొద్ది క్షణాల ముందు రెండు హెలికాప్టర్ల రోటర్లు పరస్పరం తగలడంతో ప్రమాదం సంభవించినట్లు సమాచారం. ఈ ఘటనలో ఓ భారతీయ ప్రయాణికుడు ప్రాణాలు కోల్పోగా, మరో ప్రయాణికుడు, ఒక పైలట్ గాయపడ్డారు. హెలిప్యాడ్ సమీపంలో ఉన్నవారు ప్రమాదాన్ని గమనించి భయంతో పరుగులు తీశారు.

మృతుడిని 47 ఏళ్ల వసంత్ కుమార్ బలరామరామడుగా గుర్తించారు. ఆయన ఏ రాష్ట్రానికి చెందినవారో తెలియాల్సి ఉంది. ఫిష్‌టెయిల్ ఎయిర్ హెలికాప్టర్‌లో ప్రయాణిస్తున్న భారత సంతతికి చెందిన న్యూజిలాండ్ పౌరుడు శైలేష్ క్రిష్ణ పటేల్ (49) గాయపడ్డారు. ఎయిర్ డైనాస్టీ హెలికాప్టర్ పైలట్ కూడా గాయపడినట్లు పోలీసులు వెల్లడించారు. క్షతగాత్రులను చికిత్స నిమిత్తం కాఠ్‌మాండుకు తరలించారు. పర్వత ప్రాంతాలు, మారుతున్న వాతావరణ పరిస్థితుల కారణంగా నేపాల్‌లో హెలికాప్టర్ ప్రయాణాలు సవాళ్లతో కూడుకున్నవిగా మారుతున్నాయి. ఇటీవల ఉత్తరాఖండ్‌లోని చమోలీ వద్ద జరిగిన హెలికాప్టర్ ప్రమాదంలో పైలట్ సహా ఆరుగురు మరణించిన విషయం తెలిసిందే.