400 కిలోమీటర్ల ప్రయాణ సామర్థ్యంతో కొత్త ఈ-స్కూటర్‌ను విడుదల చేసిన సింపుల్ ఎనర్జీ

దేశీయ ఎలక్ట్రిక్ వాహన రంగంలో మరో కీలక ముందడుగు పడింది. ప్రముఖ ఈ-స్కూటర్ తయారీ సంస్థ సింపుల్ ఎనర్జీ 400 కిలోమీటర్ల ప్రయాణ సామర్థ్యంతో కొత్త ఈ-స్కూటర్‌ను మార్కెట్‌లోకి విడుదల చేసింది. సింపుల్ ఆల్ట్రా అనే పేరుతో తీసుకొచ్చిన ఈ స్కూటర్ దేశంలోనే అత్యధిక రేంజ్ కలిగిన ఈ-స్కూటర్‌గా నిలుస్తుందని సంస్థ వెల్లడించింది.

ఈ స్కూటర్‌లో దేశంలోనే అతిపెద్ద ఆరు పాయింట్ ఐదు కిలోవాట్ అవర్ బ్యాటరీని అమర్చినట్లు కంపెనీ తెలిపింది. ఇది గంటకు 115 కిలోమీటర్ల గరిష్ఠ వేగంతో ప్రయాణించగలదు. అలాగే కేవలం రెండు పాయింట్ డెబ్బై ఏడు సెకన్లలో శూన్యం నుంచి నలభై కిలోమీటర్ల వేగాన్ని అందుకునే సామర్థ్యం ఉందని పేర్కొంది. సింపుల్ ఆల్ట్రాకు సంబంధించిన మరిన్ని వివరాలను త్వరలో వెల్లడిస్తామని సంస్థ స్పష్టం చేసింది.

వినియోగదారుల అవసరాలను దృష్టిలో పెట్టుకుని, ఎక్కడా రాజీ పడకుండా అత్యధిక రేంజ్‌తో పాటు శక్తివంతమైన పనితీరుతో ఈ స్కూటర్‌ను రూపొందించామని సంస్థ వ్యవస్థాపకుడు తెలిపారు.

ఆల్ట్రాతో పాటు మరో మూడు స్కూటర్లను కూడా కంపెనీ విడుదల చేసింది. అందులో సింపుల్ వన్ జనరేషన్ టూ మోడల్ ఒకటి. ఇది 190 కిలోమీటర్ల ప్రయాణ సామర్థ్యాన్ని అందించగా, దీని ధరను లక్ష నలభై తొమ్మిది వేల తొమ్మిది వందల తొంభై తొమ్మిది రూపాయలుగా నిర్ణయించారు. ఈ మోడల్ రెండు బ్యాటరీ రూపాల్లో అందుబాటులో ఉంది. నాలుగు పాయింట్ ఐదు కిలోవాట్ అవర్ బ్యాటరీతో వచ్చే వేరియంట్ 236 కిలోమీటర్ల రేంజ్‌ను ఇస్తుండగా, ఐదు కిలోవాట్ అవర్ బ్యాటరీతో వచ్చే వేరియంట్ 265 కిలోమీటర్ల ప్రయాణ సామర్థ్యాన్ని కలిగి ఉంది. వీటి ధరలు లక్ష అరవై తొమ్మిది వేల తొమ్మిది వందల తొంభై తొమ్మిది రూపాయల నుంచి ప్రారంభమవుతాయని సంస్థ తెలిపింది.