యమహా ఆర్‌-సిరీస్‌లో కొత్త బైక్‌ లాంచ్‌

యమహా మోటార్‌ ఇండియా ఆర్‌-సిరీస్‌లో కొత్త వైజడ్‌ఎఫ్‌-ఆర్2 మోటార్‌సైకిల్‌ను భారత మార్కెట్లో విడుదల చేసింది. దీని ప్రారంభ ఎక్స్‌-షోరూమ్‌ ధర రూ.2,30,500గా, టాప్‌ వేరియంట్‌ వైజడ్‌ఎఫ్‌-ఆర్2 ఎం ధర రూ.2,53,000గా నిర్ణయించింది. బైక్‌ డెలివరీలు సెప్టెంబర్‌ మధ్య నుంచి ప్రారంభం కానున్నాయి. భారత్‌ ఈ మోడల్‌కు ప్రపంచంలోనే తొలి మార్కెట్‌గా నిలిచింది.

వైజడ్‌ఎఫ్‌-ఆర్2లో 204 సీసీ లిక్విడ్‌-కూల్డ్‌ సింగిల్‌ సిలిండర్‌ ఇంజిన్‌ ఉండగా, ఇది 26.5 బీహెచ్‌పీ శక్తిని, 19.1 ఎన్ఎం టార్క్‌ను ఉత్పత్తి చేస్తుంది. 149 కిలోల కెర్బ్‌ వెయిట్‌తో ఈ బైక్‌ తేలికపాటి స్పోర్ట్స్‌ బైక్‌గా రూపొందింది. 17 అంగుళాల వీల్స్‌, డ్యూయల్‌-ఛానల్‌ ఏబీఎస్‌, ట్రాక్షన్‌ కంట్రోల్‌, అసిస్ట్‌ అండ్‌ స్లిప్పర్‌ క్లచ్‌, మూడు రైడింగ్‌ మోడ్‌లు ఉన్నాయి. రెండో వేరియంట్‌లో బైడైరెక్షనల్‌ క్విక్‌ షిఫ్టర్‌ ఉండగా, టాప్‌ ఆర్2ఎం వేరియంట్‌లో అడ్జస్టబుల్‌ సస్పెన్షన్‌, స్మార్ట్‌ కీ వంటి అదనపు ఫీచర్లు ఉన్నాయి.