వజ్రాల మార్కెట్‌లో భారీ పతనం..

ప్రపంచవ్యాప్తంగా డైమండ్ మార్కెట్ ప్రస్తుతం తీవ్ర ఒత్తిడిని ఎదుర్కొంటోంది. సహజ వజ్రాల ధరలు దాదాపు 20 ఏళ్లలో ఎన్నడూ లేనంత కనిష్ఠ స్థాయికి పడిపోయాయి. 2021లో నమోదైన గరిష్ఠ ధరలతో పోలిస్తే హోల్‌సేల్ రేట్లు సుమారు 30–40 శాతం తగ్గాయి. మార్కెట్లో డిమాండ్ మందగించడం, అధిక సరఫరా, ల్యాబ్‌ గ్రోన్ డైమండ్ల నుంచి పెరుగుతున్న పోటీ ఈ ధరల పతనానికి ప్రధాన కారణాలుగా ఉన్నాయి. ప్రస్తుతం ఒక క్యారెట్ సహజ రౌండ్ డైమండ్ రిటైల్ ధర సుమారు 3,530 నుంచి 3,860 డాలర్ల మధ్య ఉంది. సహజ వజ్రాలతో రసాయనికంగా, భౌతికంగా సమానమైన ల్యాబ్‌ గ్రోన్ డైమండ్లు 70–85 శాతం వరకు తక్కువ ధరకే లభిస్తున్నాయి. 2022తో పోలిస్తే వీటి హోల్‌సేల్ ధరలు 75 శాతానికి పైగా తగ్గగా, 2025 మార్చి నుంచి దాదాపు 29.9 శాతం క్షీణించాయి. అదే నాణ్యత కలిగిన సహజ వజ్రాల ధరలు మాత్రం సుమారు 4 శాతం తగ్గాయి.

ల్యాబ్‌ గ్రోన్ డైమండ్ల ఉత్పత్తిలో చైనా కీలక పాత్ర పోషిస్తోంది. ప్రపంచ ఉత్పత్తిలో 60 శాతానికి పైగా చైనా వాటా ఉన్నట్లు పరిశ్రమ గణాంకాలు సూచిస్తున్నాయి. ఈ ఏడాది తొలి ఆరు నెలల్లో చైనా నుంచి ల్యాబ్‌ గ్రోన్ డైమండ్ల ఎగుమతులు 65.3 శాతం పెరగడం మార్కెట్‌పై మరింత ఒత్తిడిని పెంచింది. దీంతో మధ్యస్థాయి సహజ వజ్రాల అమ్మకాలు ప్రభావితమవుతున్నాయి. అయితే అరుదైన, అత్యుత్తమ నాణ్యత కలిగిన పెద్ద సహజ వజ్రాలు వాటి ప్రత్యేకత, అరుదైన లభ్యత కారణంగా కొంత విలువను కొనసాగిస్తున్నాయి. ధరల పతనం డైమండ్ మైనింగ్ రంగంపైనా ప్రభావం చూపుతోంది. డిబియర్స్, బోట్స్వానా ప్రభుత్వం సంయుక్తంగా నిర్వహించే డెబ్‌స్వానా సంస్థ కూడా అమ్మకాల క్షీణతను ఎదుర్కొంటోంది. సాంకేతిక పురోగతితో ల్యాబ్‌ గ్రోన్ వజ్రాల ఉత్పత్తి మరింత పెరిగితే సహజ వజ్రాల మార్కెట్‌పై ఒత్తిడి మరింత పెరిగే అవకాశం ఉందని పరిశ్రమ వర్గాలు ఆందోళన వ్యక్తం చేస్తున్నాయి. అయితే వజ్రాలు పరస్పరం పూర్తిగా ఒకేలా ఉండవు; వాటి కట్, కలర్, క్లారిటీ వంటి అంశాల ఆధారంగా విలువ మారుతుందని నిపుణులు చెబుతున్నారు.