మహిళా వ్యాపారవేత్తలకు వేదికగా లఖ్‌పతి దీదీ మేళా

ఈ నెల 15న ఉదయం 11.30 గంటలకు భారత రాష్ట్రపతి ద్రౌపది ముర్ము లఖ్‌పతి దీదీ మేళాను లాంఛనంగా ప్రారంభించనున్నారు. దీన్‌దయాళ్‌ అంత్యోదయ యోజన–జాతీయ గ్రామీణ జీవనోపాధుల కార్యక్రమ స్ఫూర్తితో నిర్వహిస్తున్న ఈ మేళా.. 2029 నాటికి ఆరు కోట్ల మంది మహిళలను ‘లఖ్‌పతి దీదీ’లుగా తీర్చిదిద్దాలన్న ప్రభుత్వ లక్ష్యానికి తోడ్పడనుంది. వివిధ రాష్ట్రాలు, కేంద్రపాలిత ప్రాంతాల నుంచి స్వయం సహాయక సంఘాల మహిళలు తరలివచ్చి తమ ఉత్పత్తులను ప్రదర్శించనున్నారు. ఈ కార్యక్రమంలో 1,500 మందికి పైగా మహిళా వ్యాపారవేత్తలు పాల్గొననుండగా, వారి ఉత్పత్తులకు జాతీయ స్థాయిలో మార్కెట్‌ అవకాశాలు లభించనున్నాయి.

సంస్కృతి, సంప్రదాయాల సంగమం

ఈ మేళాలో పంజాబ్‌ ఫుల్కారీ, జమ్మూకశ్మీర్‌ పష్మీనా, తెలంగాణ ఇకత్‌, తేలియా రుమాల్‌ వంటి ప్రత్యేక వస్త్రకళలతో పాటు దేశవ్యాప్తంగా ప్రసిద్ధి చెందిన హస్తకళలు, మీనాకారీ, డోక్రా కళాకృతులు సందర్శకులను ఆకట్టుకోనున్నాయి. వివిధ రాష్ట్రాల సంప్రదాయ వంటకాలను అందించేందుకు ప్రత్యేకంగా 50 ఆహార విక్రయ కేంద్రాలను ఏర్పాటు చేస్తున్నారు. మహిళల సమష్టి శక్తి, విజయాలకు ప్రతీకగా 16 అడుగుల ఎత్తైన ‘శక్తి – ది స్పిరిట్‌ ఆఫ్‌ లఖ్‌పతి దీదీ’ ప్రత్యేక నిర్మాణాన్ని కూడా ఏర్పాటు చేశారు.