దేశీ ఐటీ దిగ్గజం టీసీఎస్‌ వృద్ధికి ఏఐ అండ

దేశీయ ఐటీ సేవల దిగ్గజం టాటా కన్సల్టెన్సీ సర్వీసెస్‌ (టీసీఎస్‌) 2026–27 ఆర్థిక సంవత్సరం రెండో త్రైమాసిక ఫలితాలను ప్రకటించింది. దీంతో ప్రముఖ ఐటీ సంస్థల త్రైమాసిక ఫలితాల సీజన్‌ ప్రారంభమైంది. జూలై–సెప్టెంబర్‌ త్రైమాసికంలో కంపెనీ ఏకీకృత నికర లాభం గతేడాది ఇదే కాలంతో పోలిస్తే 15% పెరిగి రూ.13,884 కోట్లకు చేరింది. గతేడాది ఇదే త్రైమాసికంలో లాభం రూ.12,075 కోట్లుగా నమోదైంది. ఈ ఏడాది ఏప్రిల్‌–జూన్‌ త్రైమాసికంలో సాధించిన రూ.13,349 కోట్లతో పోలిస్తే తాజా లాభం దాదాపు 4% పెరిగింది.

సమీక్షా త్రైమాసికంలో టీసీఎస్‌ ఆదాయం వార్షికంగా 11.2% వృద్ధితో రూ.73,188 కోట్లకు చేరింది. గతేడాది ఇదే కాలంలో ఆదాయం రూ.65,799 కోట్లుగా ఉండగా, అంతకుముందు త్రైమాసికంలో రూ.72,275 కోట్లుగా నమోదైంది. వాటాదారులకు ఒక్కో షేరుపై రూ.12 చొప్పున రెండో మధ్యంతర డివిడెండ్‌ను కంపెనీ బోర్డు ప్రకటించింది. ఇందుకు అక్టోబర్‌ 14ను రికార్డు తేదీగా, అక్టోబర్‌ 30ను చెల్లింపు తేదీగా నిర్ణయించింది. వార్షికీకరించిన కృత్రిమ మేధ (ఏఐ) విభాగం ఆదాయం 3.1 బిలియన్‌ డాలర్లకు చేరగా, త్రైమాసికంలో కొత్త ఒప్పందాల మొత్తం విలువ 9.6 బిలియన్‌ డాలర్లుగా నమోదైంది.

ఈ త్రైమాసికంలో టీసీఎస్‌ 4,258 మంది ఉద్యోగులను నియమించుకోవడంతో మొత్తం సిబ్బంది సంఖ్య 5,98,056కు చేరింది. గత 12 నెలల ఉద్యోగుల వలస రేటు 13.3%గా ఉండగా, నిర్వహణ లాభాల మార్జిన్‌ 24%గా నమోదైంది. ఎనర్జీ, రిసోర్సెస్‌, యుటిలిటీస్‌ విభాగం వార్షికంగా 5.7% వృద్ధిని సాధించగా, కన్జూమర్‌ బిజినెస్‌ 1% క్షీణించింది. ఉత్తర అమెరికా ఆదాయం 1.5% పెరగగా, భారత్‌లో 6% వృద్ధి నమోదైంది. పోర్షే, బెస్ట్‌ బై సంస్థలతో వ్యాపార పరివర్తన, ఏఐ సామర్థ్యాల విస్తరణకు సంబంధించిన వ్యూహాత్మక భాగస్వామ్యాలను కూడా టీసీఎస్‌ ప్రకటించింది.