గూగుల్ ఇంజనీర్ ‘సూపర్ కమ్యూటర్’గా గుర్తింపు

సాధారణంగా ఉద్యోగులు ఆఫీసుకి వెళ్లడానికి బైక్, కార్ లేదా మెట్రోలో ప్రయాణిస్తారు. కానీ గూగుల్‌లో పనిచేస్తున్న హాంగ్ (జాసన్) వై మాత్రం వారానికి ఒక నగరం నుంచి మరో నగరానికి విమానంలో వెళ్తూ ‘సూపర్ కమ్యూటర్’గా గుర్తింపు పొందారు. గూగుల్‌లో ఫ్లో- ఏఐ విభాగంలో పనిచేస్తున్న ఆయన, బే ఏరియాలో తన ఉద్యోగాన్ని కొనసాగిస్తూ, సీటెల్‌లో అమెజాన్‌లో పనిచేస్తున్న తన జీవిత భాగస్వామి కెరీర్‌ను దెబ్బతీయకుండా ఉండేందుకు ఈ విధంగా ప్రయాణిస్తున్నారు.

ప్రతి వారం సీటెల్ నుంచి శాన్ జోస్‌కు వెళ్లి, మళ్లీ వారాంతంలో తిరిగి రావడం ఆయన రొటీన్. రెండు నగరాల్లో ఇల్లు అద్దె, విమాన టిక్కెట్లు, ఉబర్ ఖర్చులు, పన్నులు కలిపి నెలకు సుమారు 3,000 డాలర్లు ఖర్చవుతోంది. ఇంత బిజీగా ఉన్నప్పటికీ, ఆయన ఖాళీ సమయంలో 500 మంది సబ్‌స్క్రైబర్లతో ఒక న్యూస్‌లెటర్ కూడా నిర్వహిస్తున్నారు. ఖర్చుకంటే అనుభవం, అభివృద్ధి ముఖ్యం అని నమ్ముతున్న వై, నేటి యువతకు ఒక ఉదాహరణగా నిలుస్తున్నారు.