

బంగాళాఖాతంలో అక్వాన్ తుఫాన్ కొనసాగుతోంది. గత తొమ్మిది గంటలుగా ఇది దాదాపు స్థిరంగా కేంద్రీకృతమై ఉందని వాతావరణ శాఖ వెల్లడించింది. ప్రస్తుతం చెన్నైకి 610 కిలోమీటర్లు, మచిలీపట్నానికి 660 కిలోమీటర్లు, విశాఖపట్నానికి 670 కిలోమీటర్లు, ఒడిశాలోని గోపాల్పూర్కు 790 కిలోమీటర్ల దూరంలో తుఫాన్ కేంద్రీకృతమై ఉంది. మంగళవారం సాయంత్రానికి తీవ్ర తుఫాన్గా, గురువారం ఉదయానికి అతి తీవ్ర తుఫాన్గా బలపడే అవకాశం ఉందని అధికారులు అంచనా వేస్తున్నారు. ఈ నెల 20వ తేదీ మధ్యాహ్నం నెల్లూరు–తుని మధ్య ఆంధ్రప్రదేశ్ తీరాన్ని దాటే అవకాశం ఉందని తెలిపారు. తీరం దాటే సమయంలో గంటకు 120–130 కిలోమీటర్ల వేగంతో గాలులు వీయవచ్చని, గరిష్ఠంగా 145 కిలోమీటర్ల వేగంతో ఈదురుగాలులు వీచే అవకాశం ఉందని హెచ్చరించారు.
తుఫాన్ ప్రభావంతో బుధవారం కోస్తాంధ్రలో అక్కడక్కడ భారీ వర్షాలు కురిసే సూచనలు ఉన్నాయి. ఈ నెల 19, 20 తేదీల్లో అత్యంత భారీ వర్షాలు కురిసే అవకాశం ఉందని అధికారులు తెలిపారు. మత్స్యకారులు సముద్రంలో వేటకు వెళ్లరాదని విపత్తుల నిర్వహణ సంస్థ హెచ్చరించింది. కోస్తా తీర ప్రాంత ప్రజలు అప్రమత్తంగా ఉండాలని, వ్యవసాయ పనుల్లో రైతులు తగిన ముందస్తు జాగ్రత్తలు తీసుకోవాలని సూచించింది. తుఫాన్ సంబంధిత సమాచారం, సహాయం కోసం 'మన మిత్ర' వాట్సప్ నంబర్ 95523 00009ను సంప్రదించవచ్చు. అత్యవసర సహాయం కోసం 112, 1070, 1800 425 0101 టోల్ఫ్రీ నంబర్లను వినియోగించుకోవాలని అధికారులు సూచించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!