పాకిస్థాన్‌పై గెలుపు అంత ఈజీ కాదు.. ఆసియా క్రీడల స్వర్ణంపై సంజూ శాంసన్

ఆసియా క్రీడల పురుషుల క్రికెట్‌లో భారత్ స్వర్ణ పతకాన్ని నిలబెట్టుకుంది. చిరకాల ప్రత్యర్థి పాకిస్థాన్‌తో జరిగిన ఉత్కంఠభరిత ఫైనల్‌లో 19 పరుగుల తేడాతో విజయం సాధించింది. తొలుత బ్యాటింగ్ చేసిన భారత్.. అభిషేక్ శర్మ, తిలక్ వర్మ అర్ధసెంచరీలతో నిర్ణీత ఓవర్లలో ఆరు వికెట్లకు 211 పరుగుల భారీ స్కోరు సాధించింది. లక్ష్య ఛేదనలో పాకిస్థాన్ దూకుడుగా ఆడుతూ మ్యాచ్‌ను చివరి వరకు ఉత్కంఠగా మార్చింది. అయితే భారత బౌలర్లు సమష్టిగా రాణించడంతో పాకిస్థాన్ ఆరు వికెట్లకు 192 పరుగులకే పరిమితమైంది.

మ్యాచ్ అనంతరం సంజూ శాంసన్ మాట్లాడుతూ ఈ స్వర్ణం సులభంగా దక్కలేదని, ఎంతో కష్టపడి సాధించామని తెలిపాడు. అనుభవజ్ఞులైన ఆటగాళ్లతో కూడిన భారత ‘ఏ’ జట్టును ఆసియా క్రీడలకు పంపడం ఫైనల్‌లో ఒత్తిడిని ఎదుర్కోవడంలో ఎంతో ఉపయోగపడిందని చెప్పాడు. మ్యాచ్‌లు, ప్రాక్టీస్ లేని సమయంలో కూడా తమను తాము ప్రేరేపించుకోవడం, శక్తిని కాపాడుకోవడం అనుభవజ్ఞులైన ఆటగాళ్లకు తెలుసని వివరించాడు. 200కు పైగా పరుగులు చేసిన తర్వాత పాకిస్థాన్‌కు ఛేజింగ్ కష్టమవుతుందని భావించినప్పటికీ, మంచి బ్యాటింగ్ పరిస్థితుల కారణంగా ప్రత్యర్థి గట్టిగా పోరాడిందని పేర్కొన్నాడు. ఆసియా క్రీడల్లో దేశానికి ప్రాతినిధ్యం వహించడం గొప్ప అవకాశమని, ఆట మొదలైన తర్వాత పరిస్థితులకు అనుగుణంగా ఆడుతూ ఒత్తిడిని దూరంగా ఉంచామని సంజూ తెలిపాడు.