వయసు కాదు, ప్రదర్శనే ప్రామాణికం కావాలి - వీరేంద్ర సెహ్వాగ్

టీమ్‌ఇండియా యువ బ్యాటర్ వైభవ్ సూర్యవంశీకి మాజీ డాషింగ్ ఓపెనర్ వీరేంద్ర సెహ్వాగ్ మద్దతుగా నిలిచాడు. అతడి వయసును పరిగణనలోకి తీసుకోకుండా, ప్రదర్శన ఆధారంగా భారత జట్టులో అవకాశం కల్పించాలని సూచించాడు. ప్రస్తుతం మంచి ఫామ్‌లో ఉన్న వైభవ్, తనలాగే తొలి బంతి నుంచే దూకుడుగా ఆడాలనే తపనతో ఉంటాడని సెహ్వాగ్ అభిప్రాయపడ్డాడు. అయితే, వైభవ్‌కు టీమ్‌ఇండియాలో ఎప్పుడు అవకాశం లభిస్తుంది? ఎన్ని మ్యాచ్‌లు ఆడే అవకాశం దక్కుతుంది? అనేదే కీలకమని పేర్కొన్నాడు.

వయసు ఆధారిత క్రికెట్‌లో ఆటగాళ్ల వయసును పరిగణనలోకి తీసుకోవడం అవసరమని సెహ్వాగ్ వివరించాడు. అయితే, ఐపీఎల్ లేదా సీనియర్ భారత జట్టుకు ఎంపిక చేసే సమయంలో మాత్రం వయసును కొలమానంగా చూడకూడదని అభిప్రాయపడ్డాడు. 37 ఏళ్ల విరాట్ కోహ్లి అయినా, 15 ఏళ్ల వైభవ్ సూర్యవంశీ అయినా మైదానంలో వారి ప్రదర్శనే ప్రామాణికం కావాలని స్పష్టం చేశాడు. సెహ్వాగ్ వ్యాఖ్యలతో వైభవ్‌కు జాతీయ జట్టులో అవకాశం కల్పించాలనే అంశంపై మరోసారి చర్చ మొదలైంది.