భారత్ సమ్మిట్‌కు హైదరాబాద్ మరోసారి ఆతిథ్యం: ఎంపీ చామల

భారత్ సమ్మిట్‌కు హైదరాబాద్ మరోసారి ఆతిథ్యం ఇవ్వనుందని భువనగిరి ఎంపీ చామల కిరణ్ కుమార్ రెడ్డి తెలిపారు. నవంబర్ 12, 13, 14 తేదీల్లో నిర్వహించనున్న ఈ సదస్సుకు 70 దేశాల నుంచి వెయ్యి మందికి పైగా ప్రతినిధులు హాజరుకానున్నారని వెల్లడించారు. పాలసీ మేకర్లు, థింక్ ట్యాంకర్లు, సామాజిక కార్యకర్తలు పాల్గొనే ఈ సదస్సులో లోక్‌సభ ప్రతిపక్ష నేత రాహుల్ గాంధీ ప్రసంగించనుండగా, తెలంగాణ సీఎం రేవంత్ రెడ్డి, ఉప ముఖ్యమంత్రి మల్లు భట్టి విక్రమార్క కూడా హాజరుకానున్నారు.

హైదరాబాద్ రెండోసారి ఈ అంతర్జాతీయ సదస్సుకు వేదిక కావడం తెలంగాణకు గర్వకారణమని చామల పేర్కొన్నారు. ఐటీ, ఫార్మా రంగాలకు పేరొందిన హైదరాబాద్ ఇప్పుడు అంతర్జాతీయ విధాన చర్చలకు కూడా కేంద్రంగా ఎదుగుతోందన్నారు. నగరంలోని సాంకేతిక పరిజ్ఞానం, యువశక్తి, ప్రపంచ స్థాయి అనుసంధానం, భద్రత, మౌలిక సదుపాయాలు అంతర్జాతీయ ప్రతినిధులకు అనుకూలంగా ఉంటాయని తెలిపారు. ఈ సదస్సుతో రాష్ట్రానికి విదేశీ పెట్టుబడులు, పర్యాటక రంగం, హైదరాబాద్ బ్రాండ్ ఇమేజ్ పరంగా ప్రయోజనాలు కలుగుతాయని ఆశాభావం వ్యక్తం చేశారు.