రోహిత్‌ గ్రూప్‌కు ఊహించని షాక్...నలుగురూ నామినేషన్స్‌లోకి

బిగ్ బాస్ తెలుగు 10లో ‘టోటల్ డామినేషన్’ టాస్క్ ముగిసింది. మూడు రౌండ్లలో రెండింటిలో విజయం సాధించిన అపూర్వ నేతృత్వంలోని భైరవ టీమ్ ఓవరాల్ విన్నర్‌గా నిలిచింది. టీమ్ తరఫున వంశీ, సుధీర్‌లను అత్యుత్తమ ఆటగాళ్లుగా ఎంపిక చేయగా ఫైనల్ దశలో వారికి ప్రత్యేక ప్రయోజనాలు లభించాయి. మరోవైపు టాస్క్‌ సమయంలో తీవ్ర పోటీ నెలకొంది. ఝాన్సీ గాయపడగా, అపూర్వ, షాలినీ తమ మధ్య ఉన్న విభేదాలను పక్కనపెట్టి అనూహ్యంగా కలిసిపోయారు.

టాస్క్ ముగిసిన తర్వాత కూడా హౌస్‌లో విభేదాలు కొనసాగాయి. సుధీర్ కెప్టెన్ రూమ్‌ను ఉపయోగించడంపై ముకేష్ ప్రశ్నించగా, రోహిత్ అతడిని సమర్థించాడు. అనంతరం రోహిత్, త్రిగుణ్ మధ్య మరోసారి వాగ్వాదం జరిగింది. ఆట తీరుపై ఇద్దరూ పరస్పరం ఆరోపణలు చేసుకున్నారు. మరోవైపు కెప్టెన్ అపూర్వ, ముకేష్ మధ్య కొనసాగుతున్న విభేదాలు కూడా మరోసారి బయటపడ్డాయి. వర్తిని ఇద్దరి మధ్య సర్దిచెప్పేందుకు ప్రయత్నించింది. దీంతో నామినేషన్స్‌కు ముందే హౌస్ వాతావరణం వేడెక్కింది.

నామినేషన్స్‌లో త్రిగుణ్ రోహిత్‌ను, నరేష్ అమన్‌ను, ఝాన్సీ సృష్టిని, అమన్ త్రిగుణ్‌ను నామినేట్ చేశారు. కెప్టెన్ అపూర్వ కూడా త్రిగుణ్‌ను టార్గెట్ చేసింది. రామ్ ప్రసాద్ షాలినిని, రోహిత్ దేబ్జానీని, వర్తిని సృష్టిని నామినేట్ చేయగా.. వంశీ, సుధీర్ కలిసి చరణ్‌ను నామినేట్ చేశారు. దీంతో ముకేష్, త్రిగుణ్, దేబ్జానీ, రోహిత్, షాలిని, అమన్, నరేష్, చరణ్, సృష్టి ఈ వారం నామినేషన్స్‌లో నిలిచారు. వీరిలో రోహిత్, అమన్, సృష్టి, షాలినీ ఒకే గ్రూప్‌గా కనిపిస్తున్న నేపథ్యంలో నలుగురూ ఒకేసారి నామినేట్ కావడం హౌస్‌లో ఆసక్తికర పరిణామంగా మారింది.