‘సెలబ్రిటీ మాస్టర్‌చెఫ్ తమిళం’కు హోస్ట్‌గా సమంత

ఇటీవల ‘మా ఇంటి బంగారం’ చిత్రంతో ప్రేక్షకులను అలరించిన సమంత రూత్ ప్రభు. ఇప్పుడు తమిళంలో కొత్త బాధ్యతను స్వీకరించారు. ప్రముఖ రియాలిటీ షో ‘సెలబ్రిటీ మాస్టర్‌చెఫ్ తమిళం’కు ఆమె హోస్ట్‌గా వ్యవహరించనున్నట్లు సోనీ పిక్చర్స్ నెట్‌వర్క్స్ ఇండియా ప్రకటించింది. ఈ షో సోనీ విజా, సోనీ లివ్ వేదికలపై త్వరలో ప్రసారం కానుంది. తమిళ వినోద రంగానికి చెందిన పలువురు ప్రముఖులు ఇందులో పాల్గొననున్నారు.

ఈ షో తన గత ప్రాజెక్ట్‌లకు పూర్తిగా భిన్నమైనదని సమంత తెలిపారు. ఆహారం ప్రజలను ఒక్కచోట చేర్చి, మధురమైన జ్ఞాపకాలను సృష్టించే శక్తి కలిగి ఉందని ఆమె అన్నారు. ప్రముఖులు వంటగదిలోకి వచ్చి కొత్త వంటకాలను ప్రయత్నిస్తూ, సవాళ్లను ఎదుర్కొంటూ పోటీపడటం ఆసక్తికరంగా ఉంటుందని పేర్కొన్నారు. ఈ కార్యక్రమం ద్వారా ప్రేక్షకులతో కొత్త అనుభూతిని పంచుకోవడానికి తాను ఉత్సాహంగా ఎదురుచూస్తున్నట్లు సమంత చెప్పారు.