సీఎం రేవంత్ రెడ్డిని కలిసిన కాంగ్రెస్ ఎమ్మెల్సీ అభ్యర్థులు

తెలంగాణ శాసన మండలి పట్టభద్రుల నియోజకవర్గాల కాంగ్రెస్ అభ్యర్థులు సామ రామ్మోహన్ రెడ్డి, రాంరెడ్డి సర్వోత్తమ్ రెడ్డి ముఖ్యమంత్రి రేవంత్ రెడ్డిని మర్యాదపూర్వకంగా కలిశారు. తమను ఎమ్మెల్సీ అభ్యర్థులుగా ప్రకటించినందుకు ముఖ్యమంత్రికి వారు కృతజ్ఞతలు తెలిపారు. మహబూబ్‌నగర్-రంగారెడ్డి-హైదరాబాద్ నియోజకవర్గానికి సామ రామ్మోహన్ రెడ్డి, నల్లగొండ-ఖమ్మం-వరంగల్ నియోజకవర్గానికి రాంరెడ్డి సర్వోత్తమ్ రెడ్డిని కాంగ్రెస్ అభ్యర్థులుగా ప్రకటించిన విషయం తెలిసిందే.

ఈ సందర్భంగా సామ రామ్మోహన్ రెడ్డి, రాంరెడ్డి సర్వోత్తమ్ రెడ్డిలకు సీఎం రేవంత్ రెడ్డి అభినందనలు తెలిపారు. ఎమ్మెల్సీ ఎన్నికల నేపథ్యంలో ఓటర్ల నమోదు, ప్రచార కార్యక్రమాలకు సంబంధించి అభ్యర్థులకు ముఖ్యమంత్రి పలు సూచనలు చేసినట్లు కాంగ్రెస్ వర్గాలు తెలిపాయి. వచ్చే ఏడాది మార్చిలో ఖాళీ కానున్న రెండు పట్టభద్రుల ఎమ్మెల్సీ స్థానాలకు ఈ అభ్యర్థులను కాంగ్రెస్ ఖరారు చేసింది.