విజయ్‌కి అజిత్‌ మద్దతు – “కరూర్ ఘటనకు ఒక్కరినే తప్పుబట్టడం సరికాదు”

సెప్టెంబర్ చివరిలో తమిళనాడులోని కరూర్‌లో జరిగిన విషాద ఘటన దేశాన్ని కుదిపేసింది. తమిళగ వెట్రి కళగం అధినేత విజయ్ నిర్వహించిన రోడ్‌షోలో జరిగిన తొక్కిసలాటలో 41 మంది ప్రాణాలు కోల్పోవడం అందరినీ కలచివేసింది. ఈ సంఘటనపై రాజకీయ వర్గాల్లో, సినీ వర్గాల్లో పెద్ద చర్చే జరిగింది. డీఎంకే నాయకులు ఈ ఘటనకు విజయ్‌ను బాధ్యుడిగా పేర్కొనగా, విజయ్ పార్టీ మాత్రం ప్రభుత్వం వైఫల్యమే కారణమని పేర్కొంది. ఈ నేపథ్యంలో సినీ రంగం నుంచి పలువురు తమ అభిప్రాయాలు వ్యక్తం చేశారు — కొందరు విజయ్‌కు మద్దతు పలికారు, మరికొందరు విమర్శించారు.

ఇక ఎప్పుడూ మీడియాకు దూరంగా ఉండే అజిత్, ఈసారి ఒక ఇంటర్వ్యూలో స్పందించడం విశేషం. ఆయన మాట్లాడుతూ, “సినీ నటులుగా మేము చేసే కష్టం ప్రజల ప్రేమకోసమే. కానీ ఆ ప్రేమను చూపించే పద్ధతిలో జాగ్రత్త అవసరం. అభిమానులు, మీడియా, నిర్వాహకులు అందరూ బాధ్యతగా వ్యవహరించాలి,” అన్నారు. అజిత్‌ అభిప్రాయంలో, ఇలాంటి ఘటనలకు ఒక్కరినే బాధ్యుడిని చేయడం సరికాదు. ప్రతి ఒక్కరూ తమ వంతు బాధ్యత తీసుకుని ఇలాంటివి పునరావృతం కాకుండా జాగ్రత్తలు తీసుకోవాలని సూచించారు. అలాగే సినీ, రాజకీయ ప్రముఖులను చూడటానికి జనం అధికంగా గుమికూడే ధోరణి తగ్గాలని, ఈ కార్యక్రమాలను సక్రమంగా నిర్వహించేందుకు చర్యలు అవసరమని ఆయన వ్యాఖ్యానించారు.