ఏడు ఏళ్ల తర్వాత జగన్ కోర్టు మెట్లు ఎక్కనుండగా..! CBI కేసులో మళ్లీ హాజరు తప్పదా?

వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి మరోసారి కోర్టు మెట్లు ఎక్కాల్సిన పరిస్థితి ఏర్పడింది. అక్రమ ఆస్తుల కేసుల్లో నిందితుడిగా ఉన్న జగన్, గతంలో 16 నెలల పాటు జైలు జీవితం గడిపిన విషయం తెలిసిందే. ప్రస్తుతం ఆయన బెయిల్ పై ఉన్నారు. 2019 ఎన్నికలకు ముందు వరకు క్రమం తప్పకుండా కోర్టుకు హాజరవుతూ వచ్చిన జగన్, ముఖ్యమంత్రిగా ప్రమాణ స్వీకారం చేసిన తర్వాత కోర్టు హాజరు నుండి మినహాయింపు పొందారు. ఆ తర్వాత నుంచి ఆయన కోర్టుకు హాజరుకాలేదు. ప్రస్తుతం ఈ అక్రమ ఆస్తుల కేసులు హైదరాబాదులోని సిబిఐ ప్రత్యేక కోర్టులో విచారణలో ఉన్నాయి. అయితే, దాదాపు ఏడు సంవత్సరాల తర్వాత వచ్చే నవంబర్ 14న జగన్ స్వయంగా కోర్టుకు హాజరు కావాలని ఆదేశాలు జారీ అయ్యాయి.

ఇటీవ‌ల లండన్‌ ప‌ర్య‌ట‌న‌కు వెళ్లే ముందు సిబిఐ అనుమతి తీసుకున్న జగన్, అయితే అక్కడకు వెళ్లేటప్పుడు వేరే ఫోన్ నంబర్ ఇచ్చారని సిబిఐ అధికారులు కోర్టులో పిటిషన్ వేసిన విషయం తెలిసిందే. ఈ పిటిషన్‌పై విచారించిన సిబిఐ కోర్టు — లండన్‌ పర్యటన ముగిసిందని, ఇప్పుడు ఆ అంశం ముగిసిపోయిందని స్పష్టం చేసింది. అయితే, అదే సమయంలో నవంబర్ 14న జగన్ స్వయంగా కోర్టుకు హాజరుకావాలని మళ్లీ గుర్తు చేసింది. దీని అర్థం — సిబిఐ కోర్టు ఇప్పుడు కఠినంగా వ్యవహరిస్తోందన్నది స్పష్టంగా కనిపిస్తోంది. జగన్ దాదాపు ఏడు సంవత్సరాలుగా కోర్టుకు హాజరుకాలేదు. ఈ విషయంపై ఇటీవల సిబిఐ అధికారులు అభ్యంతరం వ్యక్తం చేశారు. కోర్టు ముందు హాజరు తప్పదని స్పష్టంచేశారు. దీనిపై గత నెలలోనే సిబిఐ కోర్టు జగన్ హాజరుకు ఆదేశాలు జారీ చేసింది. తాజాగా మరోసారి గుర్తు చేసింది.

దీంతో, జగన్ ఈసారి కోర్టుకు వెళ్లక తప్పదని సిబిఐ న్యాయవాదులు అంటున్నారు. అయితే, వైఎస్సార్‌సీపీ తరఫున న్యాయవాదులు మాత్రం "ఇంకా మాకు మరో అవకాశం ఉంది" అంటూ జాగ్రత్తగా స్పందిస్తున్నారు. మొత్తం మీద, ఏడేళ్ల విరామం తర్వాత జగన్ మళ్లీ కోర్టు మెట్లు ఎక్కబోతున్నారన్న విషయం తెలంగాణ రాజకీయ వర్గాల్లో హాట్ టాపిక్‌గా మారింది.