Ott లో ‘ఫార్మా’ వెబ్ సిరీస్!

వైద్య రంగంలో చాలా అవకతవకలు జరుగుతుంటాయి. వాటిపై ఇప్పటికే పలు సినిమాలు వచ్చాయి. అప్పుడప్పుడు వస్తూనే ఉంటాయి. ఇప్పుడు ఇదే కాన్సెప్ట్‌పై ఓ వెబ్ సిరీస్ తీశారు అదే 'ఫార్మా'. ఈ సిరీస్‌లో మలయాళ స్టార్ హీరో నివిన్ పౌలీ ప్రధాన పాత్రలో నటించాడు. ఇతడు 'ప్రేమమ్' హీరోగా దక్షిణాది ప్రేక్షకులకు పరిచయమే. ఈ సిరీస్ ఇప్పుడు స్ట్రీమింగ్‌కి సిద్ధమైంది. తాజాగా విడుదలైన ట్రైలర్ మంచి ఆసక్తిని రేపుతోంది.

ఈ సిరీస్‌లో శ్రుతి రామచంద్రన్, రజిత్ కపూర్ తదితరులు కీలక పాత్రల్లో నటించారు. పి.ఏ. అరుణ్ దర్శకత్వం వహించిన ఈ వెబ్ సిరీస్ డిసెంబర్ 19 నుంచి జియో హాట్‌స్టార్‌లో స్ట్రీమింగ్ కానుంది. తెలుగు, తమిళం, కన్నడ, మలయాళం, హిందీ, బెంగాలీ, మరాఠీ భాషల్లో అందుబాటులోకి రానుంది.

ట్రైలర్ ప్రకారం — ఓ ఫార్మా కంపెనీలో కేపీ వినోద్(నివిన్ పౌలీ), మెడికల్ రిప్రెజెంటివ్‌గా చేరతాడు. మొదట్లో సేల్స్ టార్గెట్లు సాధించలేక అవమానాలు ఎదుర్కొంటాడు. ఆ తర్వాత కష్టపడి ‘కైడోక్సిన్’ అనే ఔషధాన్ని సేల్ చేస్తూ గుర్తింపు తెచ్చుకుంటాడు. కానీ ఆ మందు వల్ల జరిగే ప్రమాదాన్ని గ్రహించిన వినోద్, తన కంపెనీకి వ్యతిరేకంగా తిరుగుబాటు చేస్తాడు. తర్వాత ఏమవుతుందనేదే కథలో ఆసక్తికరమైన భాగం. వైద్య రంగం నేపథ్యంలోని డ్రామాలు ఇష్టపడేవారికి ‘ఫార్మా’ మంచి ఎంపికగా ఉంటుంది.