పని లేకుంటే జైలులో ఉన్నట్టే — రాజశేఖర్ భావోద్వేగ వ్యాఖ్య!

ఒకప్పుడు టాలీవుడ్‌లో యాంగ్రీ యంగ్‌మ్యాన్‌గా సూపర్ క్రేజ్ పొందిన హీరో రాజశేఖర్, తన జీవితంలోని కష్టసుఖాల గురించి ఇటీవల ఓ ఆసక్తికరమైన విషయాన్ని పంచుకున్నారు.  90వ దశకంలో అంకుశం, అల్లరి మగాడు, ప్రియుడు వంటి బ్లాక్‌బస్టర్ సినిమాలతో ప్రేక్షకుల హృదయాలను గెలుచుకున్న ఆయన, తరువాత కొంతకాలం హిట్‌లు లేక ఇబ్బంది పడ్డారు. తరువాత గరుడవేగతో మళ్లీ రీఎంట్రీ ఇచ్చినప్పటికీ, ఆ తరవాతి సినిమాలు ఆశించిన విజయాన్ని ఇవ్వలేదు. గతంలో నితిన్ నటించిన ఎక్స్‌ట్రార్డినరీ మ్యాన్ సినిమాలో ప్రత్యేక పాత్ర పోషించినా, సినిమా ఫలితం నిరాశ కలిగించింది. ఇప్పుడు ఆయన మళ్లీ శర్వానంద్ నటిస్తున్న “బైకర్” చిత్రంలో ముఖ్యమైన పాత్రలో కనిపించబోతున్నారు. ఈ సినిమా టీజర్ లాంచ్ సందర్భంగా రాజశేఖర్ తన ఆరోగ్య సమస్యపై స్పష్టంగా మాట్లాడారు.
తాను చాలాకాలంగా ఇరిటబుల్ బౌల్ సిండ్రోమ్ (IBS) అనే వ్యాధితో బాధపడుతున్నానని చెప్పారు. ఇది జీర్ణ సమస్యలతో పాటు మెదడు, కండరాలపైనా ప్రభావం చూపుతుందని వివరించారు. “టీజర్ ఈవెంట్‌లో మాట్లాడమన్నారు… నాకు చాలా టెన్షన్‌ వేసింది. ఏదో తప్పుగా మాట్లాడేస్తానేమో అనిపించింది” అంటూ ఆయన హాస్యంగా చెప్పారు.  అలాగే “నాకు ఖాళీగా ఉండడం నచ్చదు, పని లేకుంటే జైలులో ఉన్నట్టే అనిపిస్తుంది” అని రాజశేఖర్ అన్నారు. ‘బైకర్’ షూటింగ్ సమయంలో ఓ ఫోటోగ్రాఫర్‌ తన వర్క్ గురించి ప్రశ్నించగా, తన దగ్గర ఇంకా చాలాసినిమాలు ఉన్నాయని చెప్పాను. దానికి అతను “ఈ వయసులో ఇంత బిజీగా ఉండటం అదృష్టం సార్” అన్నాడని రాజశేఖర్ గుర్తు చేసుకున్నారు. “ఆ మాట తరువాత నా మనసులో మార్మోగింది… నిజంగానే అదృష్టం కదా అనిపించింది” అని ఆయన అన్నారు. కరోనా సమయంలో మూడు నెలల పాటు కదలలేనంతగా అనారోగ్యం పాలయ్యానని, తర్వాత మళ్లీ కష్టపడి కోలుకున్నానని చెప్పారు.
“బైకర్ సినిమా చాలా ఇష్టపడి చేశాను. ప్రేక్షకులకు కొత్తగా అనిపిస్తుంది” అని రాజశేఖర్ తెలిపారు.