12A రైల్వే కాలనీ యూఎస్ రిలీజ్ ఎందుకు ఆగిపోయింది?

నవంబర్ 21 న విడుదల కానున్న “12A రైల్వే కాలనీ” చిత్రం యూఎస్‌లో విడుదల కాకపోవడం ఖరారైంది. మొదట నిర్మాత మంచి బయ్యర్ల కోసం వేచిచూశారు. కానీ ప్రస్తుత అమెరికా మార్కెట్‌లో ప్రేక్షకులను థియేటర్లకు రప్పించడం కష్టమవుతుండటంతో సరైన ఆఫర్లేదన్న కారణంగా నిర్ణయం మారింది. దీంతో యూఎస్ రిలీజ్‌ను వాయిదా వేయాల్సి వచ్చింది.

ఒక దశలో ఒక బయ్యర్ కొన్ని లక్షల అడ్వాన్స్‌తో రిలీజ్ చేయాలని అనుకోగా నిర్మాత అంగీకరించలేదు. రిలీజ్ సమయం దగ్గరపడే కొద్దీ ఆయన ఒప్పుకున్నా, అప్పటికే ఆ బయ్యర్ ఆసక్తిని కోల్పోయారు. దీంతో చివరికి “12A రైల్వే కాలనీ” భారత్‌లో మాత్రమే విడుదల చేయాలని నిర్ణయించారు. థ్రిల్లర్ కావడంతో స్థానిక మార్కెట్‌లో మంచి ఫలితాలు వస్తే, తరువాత యూఎస్ రిలీజ్‌పై నిర్మాత ఆలోచించే అవకాశముంది.

ఇదిలా ఉంటే, ప్రేమంటే మరియు రాజు వెడ్స్ రంబాయి లాంటి చిన్న చిత్రాలు మాత్రం యూఎస్‌లో మంచి థియేట్రికల్ రీచ్‌తో విడుదల అవుతున్నాయి. అల్లరి నరేష్, కామాక్షి భాస్కర్ల ప్రధాన పాత్రల్లో నటించిన, నాని కేసరగడ్డ దర్శకత్వం వహించిన “12A రైల్వే కాలనీ”ను శ్రీనివాసా చిట్టూరి నిర్మిస్తున్నారు.