సూర్య–జ్యోతిక స్పెషల్‌ సెలబ్రేషన్‌.. వైరల్‌గా వేడుకల వీడియో

నటులు సూర్య, జ్యోతిక తమ 20వ వివాహ వార్షికోత్సవాన్ని ఘనంగా జరుపుకున్నారు. సెప్టెంబర్‌ 11న వివాహ వార్షికోత్సవాన్ని పురస్కరించుకుని ప్రత్యేక వేడుక నిర్వహించుకున్న ఈ జంట.. తమ వివాహ ప్రమాణాలను మరోసారి పునరుద్ధరించుకున్నారు. ఈ వేడుకకు సంబంధించిన వీడియోను జ్యోతిక పంచుకున్నారు. కుటుంబ సభ్యులు, సన్నిహితుల సమక్షంలో జరిగిన ఈ వేడుకలో జ్యోతిక తెల్లటి గౌను ధరించగా.. సూర్య తెల్లటి జాకెట్‌, నల్లటి ప్యాంట్‌లో కనిపించారు.

ఈ సందర్భంగా జ్యోతిక తమ 20 ఏళ్ల వైవాహిక జీవితాన్ని గుర్తు చేసుకున్నారు. ఇది పరిపూర్ణమైన దాంపత్యానికి సంబంధించిన వేడుక కాదని.. ఒకరినొకరు అర్థం చేసుకోవడం, సర్దుబాట్లు, త్యాగాలు, నిస్వార్థ ప్రేమకు ప్రతీకగా ఈ వేడుకను నిర్వహించుకున్నామని తెలిపారు. ఒకరి కోసం మరొకరు మారిన వ్యక్తిత్వాలకు ఇది గుర్తుగా నిలుస్తుందని పేర్కొన్నారు. తనను తాను గౌరవించుకోవడం కంటే ఎక్కువగా ప్రేమించే వ్యక్తి తనను గౌరవించినప్పుడు జీవితం గొప్ప బహుమతిగా మారుతుందని సూర్యను ఉద్దేశిస్తూ జ్యోతిక పేర్కొన్నారు.