ప్రీ-సేల్స్‌తోనే సెన్సేషన్.. నార్త్ అమెరికాలో ‘మా ఇంటి బంగారం’ జోరు

సమంత ప్రధాన పాత్రలో తెరకెక్కిన ‘మా ఇంటి బంగారం’ చిత్రం జూన్ 19న ప్రపంచవ్యాప్తంగా విడుదలకు సిద్ధమవుతోంది. ఈ సినిమాకు సంబంధించిన నార్త్ అమెరికా ప్రీమియర్లు జూన్ 18న ప్రదర్శించనున్నారు. విడుదలకు ముందే ఈ చిత్రానికి ఓవర్సీస్ మార్కెట్‌లో అద్భుతమైన స్పందన లభిస్తోంది. తాజాగా చిత్ర బృందం వెల్లడించిన వివరాల ప్రకారం, నార్త్ అమెరికాలో ఈ సినిమా $125K+ ప్రీ-సేల్స్ వసూళ్లను నమోదు చేసింది.

ఇటీవలి కాలంలో ఓవర్సీస్ మార్కెట్‌లో భారీ వసూళ్లు సాధించడం స్టార్ హీరోల సినిమాలకే సవాల్‌గా మారిన నేపథ్యంలో, సమంత ప్రధాన పాత్రలో వచ్చిన ఈ చిత్రానికి లభిస్తున్న స్పందన విశేషంగా మారింది. పాజిటివ్ టాక్ వస్తే నార్త్ అమెరికాలో మరింత భారీ కలెక్షన్లు సాధించే అవకాశముందని ట్రేడ్ వర్గాలు భావిస్తున్నాయి. నందిని రెడ్డి దర్శకత్వం వహించిన ఈ చిత్రంలో గుల్షన్ దేవయ్య, గౌతమి, దిగంత కీలక పాత్రలు పోషించారు. సమంత తన ‘త్రాలాలా మూవింగ్ పిక్చర్స్’ బ్యానర్‌పై ఈ చిత్రాన్ని నిర్మించారు.