ఫ్యామిలీ ఎంటర్టైన్మెంట్లో సరికొత్త లేయర్స్ ఉన్న చిత్రం సఃకుటుంబానాం : హీరో దీక్షిత్ శెట్టి

హెచ్ ఎన్ జి సినిమాస్ ఎల్ ఎల్ పి బ్యానర్‌ పై ఉదయ్ శర్మ రచన, దర్శకత్వంలో మహదేవ్ గౌడ్, నాగరత్న నిర్మాతలుగా తెరకెక్కిన చిత్రం సఃకుటుంబానాం. ఈ సినిమా నూతన సంవత్సరం సందర్భంగా ప్రేక్షకుల ముందుకు వచ్చి మంచి ఆదరణ పొందుతోంది. రామ్ కిరణ్, మేఘ ఆకాష్ జంటగా నటించిన ఈ చిత్రంలో నటకిరీటి రాజేంద్రప్రసాద్, బ్రహ్మానందం, శుభలేఖ సుధాకర్, సత్య, రాజశ్రీ నాయర్, రచ్చ రవి, గిరిధర్, తాగుబోతు రమేష్, భద్రం తదితరులు ముఖ్య పాత్రలు పోషించారు. మణిశర్మ సంగీతం అందించగా, మధు దాసరి సినిమాటోగ్రఫీ చేశారు. ఎడిటింగ్ బాధ్యతలను శశాంక్ మలి నిర్వహించారు.

ఈ చిత్రాన్ని చూసిన హీరో దీక్షిత్ శెట్టి స్పందిస్తూ, ఇది ఒక కొత్త ఆలోచనతో రూపొందిన ఫ్యామిలీ ఎంటర్టైనర్ అని అన్నారు. సాధారణ కుటుంబ కథల్లో కనిపించని కొత్త లేయర్లు ఇందులో చూపించారని చెప్పారు. హీరో రామ్ కిరణ్ నటన చాలా సహజంగా ఉందని, కొత్త నటుడిలా అనిపించలేదని ప్రశంసించారు. మంచి కథ, మంచి టీమ్ ఒక కొత్త నటుడికి దొరకడం అదృష్టమని పేర్కొన్నారు. సినిమాలోని పాటలు, రామ్ కిరణ్ డాన్స్ ఆకట్టుకున్నాయని, కథ, స్క్రీన్‌ప్లే, దర్శకత్వం అన్నీ బాగా కుదిరాయని అన్నారు. నిర్మాణ విలువలు కూడా ఉన్నతంగా ఉన్నాయని, తొలి చిత్రంలోనే సీనియర్ నటులతో కలిసి పనిచేయడం రామ్ కిరణ్‌కు గొప్ప అవకాశం అని చెప్పారు. ఈ సినిమా మంచి విజయం సాధించాలని ఆకాంక్షించారు.