‘రణబాలి’ ట్రైలర్‌ రిలీజ్‌ డేట్‌ ఖరారు

విజయ్‌ దేవరకొండ, రష్మిక మందన్న జంటగా నటిస్తున్న మోస్ట్‌ అవైటెడ్‌ పాన్‌ ఇండియా చిత్రం ‘రణబాలి’. అక్టోబర్‌ 16న ఈ సినిమా గ్రాండ్‌గా ప్రేక్షకుల ముందుకు రానుంది. దీంతో చిత్రబృందం వరుస అప్‌డేట్స్‌ విడుదల చేస్తూ సినిమాపై ఆసక్తిని పెంచుతోంది. ఇప్పటికే విడుదలైన తొలి పాటకు మంచి స్పందన లభించగా తాజాగా ‘రణబాలి’ ట్రైలర్‌ విడుదల తేదీని మేకర్స్‌ ప్రకటించారు. అక్టోబర్‌ 8న ట్రైలర్‌ను విడుదల చేయనున్నట్లు వెల్లడించారు.

ట్రైలర్‌ విడుదల తేదీని ప్రకటిస్తూ విడుదల చేసిన పోస్టర్‌ సోషల్‌ మీడియాలో ఆకట్టుకుంటోంది. విజయ్‌ వెనుక కత్తి పెట్టుకుని, పిడికిలి బిగించి, తీవ్ర ఆగ్రహంతో కనిపిస్తున్న ఇంటెన్స్‌ లుక్‌ అభిమానులను ఆకట్టుకుంటోంది. శాపగ్రస్త భూమికి సంబంధించిన జానపద గాథను ట్రైలర్‌లో ఆవిష్కరించనున్నట్లు మేకర్స్‌ తెలిపారు. రాహుల్‌ సంకృత్యన్‌ దర్శకత్వం వహిస్తున్న ఈ చిత్రాన్ని మైత్రీ మూవీ మేకర్స్‌ పతాకంపై నవీన్‌ యెర్నేని, వై. రవిశంకర్‌ నిర్మిస్తున్నారు. 19వ శతాబ్దంలోని బ్రిటిష్‌ పాలన, కరువు పరిస్థితులు, స్వాతంత్ర్య ఉద్యమం నేపథ్యంలో కథ సాగనున్నట్లు తెలుస్తోంది. అజయ్‌-అతుల్‌ సంగీతం అందిస్తున్నారు.