శ్రేయస్ మీడియా పై ది రాజా సాబ్ హీరోయిన్ ఫైర్

టాలీవుడ్ హీరోయిన్ నిధి అగర్వాల్ ‘ది రాజా సాబ్’ సినిమా పాట లాంచ్ ప్రమోషనల్ కార్యక్రమంలో చేదు అనుభవాన్ని ఎదుర్కొన్నారు. ఈవెంట్ ముగిసిన అనంతరం ఆమె బయటకు వెళ్లే సమయంలో అభిమానులు గుంపుగా చేరి తీవ్రంగా ఆందోళన సృష్టించారు. సెల్ఫీల కోసం ఎగబడటంతో పాటు, కొందరు హద్దులు దాటి ఆమెకు అత్యంత దగ్గరగా వెళ్లేందుకు ప్రయత్నించారు. ఈ కారణంగా పరిస్థితి గందరగోళంగా మారి, నిధి అసౌకర్యానికి గురయ్యారు. అయితే, ఆమె భద్రతా సిబ్బంది వెంటనే స్పందించి ఆమెను కాపాడుతూ సురక్షితంగా కారులోకి ఎక్కించారు. అయినప్పటికీ, ఈ ఘటన ఆమెను భావోద్వేగంగా కుదిపేసింది.

ఈ ఘటనపై స్పందించిన నిధి అగర్వాల్ ఎక్స్ (ట్విట్టర్) వేదికగా తన ఆగ్రహాన్ని వ్యక్తం చేశారు. ఈ కార్యక్రమంలో సరైన భద్రతా ఏర్పాట్లు లేకపోవడాన్ని తీవ్రంగా తప్పుబట్టారు. శ్రేయస్ మీడియాపై విమర్శలు గుప్పిస్తూ, సెక్యూరిటీ పూర్తిగా విఫలమైందని, సరైన క్రౌడ్ మేనేజ్‌మెంట్ ప్లాన్ లేదని పేర్కొన్నారు. ఈ పరిస్థితిని “అత్యంత దారుణం”గా అభివర్ణిస్తూ, తన భద్రతకు భంగం కలిగించినందుకు నిర్వాహకులు బాధ్యత వహించాలని డిమాండ్ చేశారు.

ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది. దీనితో సెలబ్రిటీల భద్రతపై, అలాగే ప్రమోషనల్ కార్యక్రమాల సమయంలో నిర్వాహకులు తీసుకోవాల్సిన జాగ్రత్తలపై విస్తృత చర్చకు దారితీసింది.