రాత్రికి రాత్రే సెలబ్రిటీ కేఫ్‌గా మారిన ‘ధురంధర్‌’ షూటింగ్‌ స్పాట్‌...

ఆదిత్య ధర్‌ దర్శకత్వంలో తెరకెక్కిన ‘ధురంధర్‌’ స్పై థ్రిల్లర్‌ చిత్రానికి ప్రేక్షకుల నుంచి భారీ స్పందన లభించిన సంగతి తెలిసిందే. సినిమా విజయంతో లద్దాఖ్‌లోని షూటింగ్‌ లొకేషన్లు కూడా సోషల్‌ మీడియాలో వైరల్‌ అవుతున్నాయి. లేహ్‌ మార్కెట్‌లోని ఓ చిన్న కేఫ్‌లో రణ్‌వీర్‌ సింగ్‌ పోషించిన హమ్జా, గౌరవ్‌ గేరా నటించిన ఆలం భాయ్‌ పాత్రలకు సంబంధించిన కీలక సన్నివేశాలను చిత్రీకరించారు. సినిమా కోసం కేఫ్‌ పేరును ‘వాష్మా భట్‌’గా మార్చగా.. చిత్రానికి వచ్చిన ఆదరణతో యజమాని సోహెల్‌ అదే పేరును శాశ్వతంగా కొనసాగించినట్లు సమాచారం.

ప్రస్తుతం పర్యాటకులు ఈ ప్రదేశాన్ని ‘ధురంధర్‌ కేఫ్‌’గా పిలుస్తూ సందర్శిస్తున్నారు. అక్కడ ఫేమస్‌ అయిన ‘ధురంధర్‌ ఛాయ్‌’ను ఆస్వాదిస్తూ, సినిమా పోస్టర్లు, బోర్డుల ముందు ఫొటోలు దిగుతున్నారు. పోస్టర్ల వద్ద రూ.50 చెల్లించి ఫొటోలు దిగే అవకాశం కూడా ఉన్నట్లు సమాచారం. మరోవైపు రణ్‌వీర్‌ సింగ్‌, సారా అర్జున్‌పై చిత్రీకరించిన ‘గెహ్రా హువా’ పాటలో కనిపించే సింధూ, జాంస్కర్‌ నదుల సంగమ ప్రాంతం కూడా పర్యాటకులను ఆకర్షిస్తోంది. ముఖ్యంగా రియల్‌ లైఫ్‌ కపుల్స్‌ అక్కడ ఫొటోలు, రీల్స్‌ చేసుకోవడం పెరిగింది.