30 ఏళ్లు పూర్తి చేసుకున్న ‘భామనే సత్యభామనే’..

ప్రయోగాత్మక పాత్రలతో ప్రేక్షకులను అలరించే నటుడు కమల్‌హాసన్ కెరీర్‌లో ‘భామనే సత్యభామనే’ చిత్రానికి ప్రత్యేక స్థానం ఉంది. తమిళంలో ‘అవ్వై షణ్ముగి’ పేరుతో తెరకెక్కిన ఈ సినిమా 1996లో విడుదలై ఘన విజయాన్ని అందుకుంది. కేఎస్‌ రవికుమార్ దర్శకత్వం వహించిన ఈ చిత్రంలో మదన్‌ (కమల్‌హాసన్‌), జానకి (మీనా) ప్రేమించి పెళ్లి చేసుకుంటారు. అయితే, కూతురు పుట్టిన తర్వాత కొన్ని కారణాలతో విడిపోతారు. కోర్టు తీర్పు ప్రకారం కూతురిని వారానికి ఒక్కసారి మాత్రమే కలుసుకునే అవకాశం రావడంతో మదన్‌ తీవ్రంగా బాధపడతాడు. బిడ్డకు దూరంగా ఉండలేక, మధ్యవయస్కురాలైన మహిళ ‘శ్రీమతి భామ’గా వేషం మార్చుకుని మాజీ మామగారి ఇంట్లో ఆయాగా చేరతాడు. ఆ తర్వాత భామ వేషంలో మదన్‌ ఎదుర్కొనే హాస్యభరితమైన సంఘటనలతో కథ ఆసక్తికరంగా సాగుతుంది.

ఈ సినిమాకు కమల్‌హాసన్ నటన ప్రధాన బలంగా నిలిచింది. ముఖ్యంగా భామ పాత్రలో ఆయన నడక, మాటతీరు, హావభావాలు, శరీర భాషను సహజంగా చూపించిన తీరు ప్రేక్షకులను ఆకట్టుకుంది. క్రేజీ మోహన్‌ సంభాషణలు, కేఎస్‌ రవికుమార్‌ దర్శకత్వం సినిమాకు మరింత బలాన్నిచ్చాయి. జెమినీ గణేశన్‌, మీనా, నాజర్‌, మణివణ్ణన్‌ తమ పాత్రలతో అలరించారు. కమల్‌హాసన్‌ ప్రొస్థటిక్ మేకప్ కోసం హాలీవుడ్ మేకప్ నిపుణుడు మైఖేల్ వెస్ట్‌మోర్ సూచనలు అందించారు. ఈ మేకప్‌ వేయడానికి దాదాపు ఐదు గంటల సమయం పట్టేదని సమాచారం. దేవా స్వరపరిచిన పాటలు కూడా మంచి ఆదరణ పొందాయి. ఈ చిత్రాన్ని హిందీలో ‘చాచా 420’ పేరుతో రీమేక్ చేయగా, కమల్‌హాసన్‌ స్వయంగా దర్శకత్వం వహించారు. ఉత్తమ మేకప్‌ ఆర్టిస్ట్‌, ఉత్తమ బాలనటి విభాగాల్లో తమిళనాడు రాష్ట్ర అవార్డులు అందుకున్న ఈ చిత్రం థియేటర్లలో సుదీర్ఘ ప్రదర్శనను నమోదు చేసింది.