సోషల్ మీడియాను ఊపేస్తున్న ‘జిమ్ జిమ్ తార’.. నేడు ఫుల్ సాంగ్ రిలీజ్

టాలీవుడ్‌లో వినూత్న ప్రచారంతో ప్రేక్షకుల దృష్టిని ఆకర్షిస్తున్న హారర్ కామెడీ చిత్రం ‘పర్ణశాల’ నుంచి మరో ఆసక్తికర అప్‌డేట్‌ వచ్చింది. ఈ సినిమాలోని ‘జిమ్ జిమ్ తార’ పాట పూర్తి వెర్షన్‌ను సోమవారం ఆదిత్య మ్యూజిక్ ద్వారా అధికారికంగా విడుదల చేయనున్నట్లు చిత్ర బృందం ప్రకటించింది. ఇప్పటికే ఈ పాట సోషల్ మీడియాలో వైరల్‌గా మారి నెటిజన్లతో పాటు పలువురు సెలబ్రిటీలనూ ఆకట్టుకుంటోంది.

సాధారణంగా సినిమా పాటలు అధికారికంగా విడుదలైన తర్వాత ప్రజాదరణ పొందుతుంటాయి. అయితే ‘జిమ్ జిమ్ తార’ పాట మాత్రం పూర్తి వెర్షన్‌ విడుదలకు ముందే సోషల్ మీడియాలో విస్తృతంగా ప్రచారంలోకి వచ్చింది. పలువురు తమ వీడియోలు, రీల్స్‌లో ఈ పాటను ఉపయోగిస్తుండగా, కొన్ని సినిమాల్లోనూ దీనిని వినియోగిస్తున్నారనే చర్చ ఆసక్తిని పెంచుతోంది. ఎస్‌ఎల్‌టీ ఫిలిమ్స్‌ బ్యానర్‌పై మంచి వెంకట్ నిర్మిస్తున్న ఈ చిత్రానికి వై.జి. భరత్ దర్శకత్వం వహిస్తున్నారు. హారర్ కామెడీతో పాటు సస్పెన్స్ థ్రిల్లర్ అంశాలతో రూపొందుతున్న ఈ సినిమా, పాటకు లభిస్తున్న ఆదరణతో మరింతగా వార్తల్లో నిలుస్తోంది.