‘ధమాకా’ తర్వాత శ్రీలీల కెరీర్ డౌన్ ట్రాక్‌లోనా?

సాధారణంగా ఒక హీరోయిన్ తొలి సినిమా ఫ్లాప్ అయితే, తర్వాత అవకాశాలు రావడం కష్టమే. కానీ శ్రీలీల మాత్రం ఆ రూల్‌ని బద్దలు కొట్టింది. తెలుగులో ఆమె తొలి సినిమా ‘పెళ్లి సందడి’ ఫలితం నిరాశ కలిగించినా, అందులో ఆమె అందం, ఎనర్జీతో కూడిన డ్యాన్సులు ప్రేక్షకుల్ని ఆకట్టుకున్నాయి. ఆ క్యూట్ లుక్స్‌తో యూత్‌లో క్రేజ్ తెచ్చుకుంది. దాంతో శ్రీలీలకు వరుస ఆఫర్లు వచ్చాయి. రెండో సినిమా ‘ధమాకా’ బ్లాక్‌బస్టర్ కావడంతో ఆమె కెరీర్ ఒక్కసారిగా పీక్స్‌కి చేరింది. తర్వాత ‘గుంటూరు కారం’ లో మహేష్ బాబుతో నటించే అవకాశం రావడం, అలాగే ‘భగవంత్ కేసరి’, ‘స్కంద’ వంటి భారీ ప్రాజెక్టుల్లో భాగం కావడం ఆమె రేంజ్‌ని పెంచింది. కానీ ‘ధమాకా’ తర్వాత మాత్రం శ్రీలీలకు సరైన సక్సెస్ దొరకలేదు.

తాజాగా వచ్చిన ‘మాస్ జాతర’ లో కూడా ఆమె పాత్ర ప్రాధాన్యం లేకుండా పోయింది. రవితేజ మాస్ స్టైల్‌లో సినిమా సాగిపోవడంతో, శ్రీలీల పాత్ర కేవలం పాటలు, కామెడీ సీన్ల వరకే పరిమితమైపోయింది. నటనకు స్కోప్ లేకపోవడంతో ప్రేక్షకులు కూడా పెద్దగా ఇంప్రెస్ కాలేకపోయారు.

ప్రస్తుతం శ్రీలీల చేస్తున్న పాత్రలు ఒక్కటే మోడ్‌లో ఉండటంతో ప్రేక్షకుల్లో “ఇలాగే ఎంతకాలం?” అన్న చర్చ మొదలైంది. కేవలం డ్యాన్సులతో కాకుండా నటనలో వైవిధ్యం చూపించాల్సిన సమయం వచ్చిందని సినీ వర్గాలు భావిస్తున్నాయి. అయితే రానున్న ‘పరాశక్తి’ సినిమాలో దర్శకురాలు సుధా కొంగర శ్రీలీలకు భిన్నమైన రోల్ ఇచ్చిందట. ఆ సినిమా ఆమె కెరీర్‌లో కొత్త టర్నింగ్ పాయింట్ అవుతుందా అన్నది ఇప్పుడు అందరి ఆసక్తి.