బాలయ్య స్థాయి ఇంటెన్సిటీ మిస్ అయ్యిందా? జన నాయకుడు పై చర్చ

జన నాయకుడు ట్రైలర్ విడుదలైన తర్వాత చాలా రోజులుగా నడుస్తున్న అనుమానాలకు తెరపడింది. షూటింగ్ ప్రారంభం నుంచే ఇది ‘భగవంత్ కేసరి’ రీమేక్ అనే ప్రచారం సాగినా, చిత్రబృందం ఆ ఆరోపణలను ఖండిస్తూ వచ్చింది. అయితే ట్రైలర్ చూశాక మాత్రం ప్రేక్షకులకు పూర్తి క్లారిటీ వచ్చినట్టే కనిపిస్తోంది. ట్రైలర్‌లోని చాలా సన్నివేశాలు ‘భగవంత్ కేసరి’కి చాలా దగ్గరగా ఉండటంతో సోషల్ మీడియాలో పోలికలపై చర్చ ఊపందుకుంది.

ఫ్యాక్టరీ ఫైట్ నుంచి జైలు ఎపిసోడ్ వరకు రెండు సినిమాల్లో సన్నివేశాలు దాదాపు ఒకేలా ఉన్నాయనే అభిప్రాయం వ్యక్తమవుతోంది. రాజకీయ కోణంలో కొంత మార్పు చేసినప్పటికీ, కథా ప్రవాహం మాత్రం సెట్ టు సేమ్ అన్నట్టుగా ఉందని నెటిజన్లు స్క్రీన్‌షాట్లు షేర్ చేస్తున్నారు. దీంతో ఇది రీమేక్ కాదని చెప్పిన మాటలపై కూడా ప్రశ్నలు మొదలయ్యాయి.

అయితే అసలు చర్చ ఏంటంటే… ‘భగవంత్ కేసరి’లో కనిపించిన ఇంటెన్సిటీ ‘జన నాయకుడు’లో కనిపించలేదన్న భావన. బాలయ్య హుందాతనం, అనిల్ రావిపూడి టేకింగ్, తమన్ నేపథ్య సంగీతం కలిసి ఆ సినిమాకు ప్రత్యేక బలంగా నిలిచాయి. అదే స్థాయి ప్రభావం కొత్త చిత్రంలో కనిపించకపోవడం అభిమానులను నిరాశపరుస్తోంది. బడ్జెట్ పెద్దదైనా, ఆ ఎమోషనల్ ఫైర్ మిస్ అయిందా? అన్నదే ఇప్పుడు సినీ వర్గాల్లో హాట్ టాపిక్‌గా మారింది.